Redakshon
Kralendijk,– Dia 5 di yüli Tourism Corporation Bonaire (TCB) a anunsiá su promé line-up pa loke ta trata farándula pa Regata 2024, ku entre otro Icons, DJ Krokz, MC Chris Strick for di Kòrsou i Tsunami for di Aruba, i bandanan lokal manera Luis Moka i Palu Grandi, Payola, Fenty, JC & Friends, FMK, Ritmiko Timon, Foyan Boys i Grupo ESO.
Headliner di e di dos seri di anunsio ta Boneiru su propio Semii Marten, un artista dinámiko ku ta konosí pa su inkreibel energia, talento di karisma. No opstante su skema sumamente okupá, e ta kombiná su karera artístiko ku su estudio. Su hitnan, entre otro “Perdí”, “Pida Ko’i Bon” huntu ku Dongo, “Baila Ku Bo” produsí pa Url Isenia i Dandan, i “Kla Kuné” huntu ku Jaido, a dun’é rekonosimentu amplio. Su release mas nobo, “Poko Poko” ku Qshans, rápidamente a bira favorito serka su fanátikonan, loke ta aksentuá su versatilidat i su pashon profundo pa músika i baile.
Tsean, un artista renombrá for di Hulanda, pero nasé na Kòrsou, tambe ta forma parti di e line-up di Regata. Aktualmente e ta hasi furor ku su ‘Playground Tour’, un tour manera niun otro. E ta un artista ku ta konosí pa e trèntnan ku e ta establesé den esena di Ritmo Kombiná – un fushon di músika afro-karibense i latino-amerikano. Despues ku komo mucha chikí el a aktua den gruponan musikal kultural na Kòrsou, Regata na Boneiru tabata definitivamente un evento ku e tabata gusta bishitá. Komo mucha esaki tabata un di su biahenan favorito. I awor e ta bèk pa tuma e tarima over komo e mihó artista di Ritmo Kombiná ku aktuashonnan ‘live’, ku no solamente su propio hitnan favorito, pero tambe esunnan di nos, manera: ‘Kurashi’, ‘Nos No Por Ninga’, ‘Pega’, ‘Sirkunstansia’, ‘Sorry’, ‘Seña’ i ‘Dimi So’.
DJ Osocity for di Merka tambe lo hasi su debut na Boneiru durante Regata 2024. Osocity ta un DJ i produktor di músika mundialmente rekonosé i e ta konosí pa su aktuashonnan elektrisante i su estilo musikal variá. Ku kasi 3 mion siguidó riba YouTube mundialmente el a sa di kaptivá su públiko pa medio di su aktuashonnan na destinashonnan manera Saba, Inglatera, Belize, Paris, Dubai, Canada, Suisa i Sürnam.
Tambe TCB ke rekordá tur esnan ku ta interesá den partisipashon na Regata ku nan ‘foodtruck’ òf stènt ku ainda tin lugá disponibel. Bishitá e wèpsait di Regata pa registrá bo mes.
E preparashonnan pa e aktividatnan riba laman ta den pleno marcha i registrashon ta habrí kaba via e wèpsait.
No pèrdè esaki: bestèl bo tishùrt di Regata awor via www.regattabonaire.com.
Keda konektá ku nos riba Facebook i Instagram: @RegattaBonaire. Pa e último aktualisashonnan, informashon di registrashon, skema di evento i pa bestèl tishùrt i otro merkansia i mas, bai riba www.regattabonaire.com.
Fuente:TCB/LIVE99FM
GIPHY App Key not set. Please check settings