SINDIKALISMO TA HOPI PREOKUPÁ

Kralendijk,- Sindikalismo ta hopi preokupá. E preokupashon aki ta basá riba e datonan ku nos ta disponé di dje i ku ta ilustrá dos punto hopi importante, esta nos dependensia grandi pa nos eksistensia di faktornan pafó di nos i e desigualdat den entrada den e komunidat. Esaki ta pone ku nos komo partnernan den Dialogo Sentral mester hasi mas esfuerso pa logra un komunidat husto i ku un grado haltu di outosufisiensia. E preokupashon aki tambe nos a ekspresá den nos promé enkuentro ku e sekretario di estado nobo sr. Zsabó.

Un di e faktornan sigur ku ta di influensha direkto riba e desigualdat di entrada den nos komunidat ta e echo ku un mayoria grandi di nos forsa laboral no tin un diploma básiko pa kuminsá nan karera laboral i ku esei ta keda pegá riba un nivel di salario abou. Deskriminashon den e merkado laboral tambe por ta un faktor ku ta krea e diferensha entre pago di salarionan. E di tres faktor naturalmente ta e speshalisashon riba merkado laboral ku ta paga salario mas altu pa profeshonnan speshalisá. Segun sifranan di CBS di 2021 e sektornan ku tin mas tantu kupo di traobu den sekuensia di kantidat di trahadó ta horeca, servisio, kuido, gobernashon, komèrsio, konstrukshon, kultura, rekreashon, ernseñasna, transporte, hür i komèrsio den inmuebles, energia. industria, servisio finansiero, agrikultura, krio di bestia i peskeria. Mientras den e sektornan ku ta duna servisio tin alredor di 11830 kupo di trabou nos ta mira ku den sektor industrial tin solamente 230 kupo di trabou, miéntras ku den sektor di produkshon di kuminda apénas tin 20 kupo di trabou.

Esaki ta krea e di dos preokupashon grandi serka sindikalismo, esta ku nos seguridat dieksistensia, esta kuminda, nos ta kompletamente dependiente di faktornan pafó di nos influensha. I esaki ta un desaroyo no saludabel i ku ta pone ku importadornan di kuminda tin un influensha asina grandi ku ta nan ta determiná pa gran parti nos kosto di bida pa loke ta trata kuminda. Un lus mester sende serka nos tur ku stima e isla aki i realisá ku nos mester krea mas sektor produktivo den nos ekonomia, pero tambe hopi importante nos mester bai na invertí konsientemente den e sektor di produkshon di kuminda hasiendo uso di teknologianan moderno pa esaki. Den e gabinete nobo na Ulanda tin un partido ku tin seguridat di eksistensia altísimo den nan bandera, esei ta e partido di e “boeren”nan. Seguridat dio eksistensia ta parti esensial tambe di e akuerdo di liña grandi di e koalishon PVV/VVD/NSC/BBB.

Un di e puntonan di lanse di e e sekretario di estado Zsabo ku ela kompartí ku nos djabièrnè último ta outosufisiensia. Pa nos den sindikalismo produkshon di nos propio kuminda ta forma parti esenshal di maneho di nos kosto di bida lokal. Si huntu nos logra diseñá un maneho riba término largo pa e sektor aki, esta plantamentu, krio di bestia i peskeria, nos lo baha nos dependensia riba faktornan pafó di nos esfera di influensha konsiderabelmente. A yega tempu pa nos konsolidá nos industria di turismo, traha riba mehorashon di e produkto, alsa kalidat di nos labor pa e paga bon i duna atenshon serio ku fondonan lokal, pero tambe ku fondonan di Ulanda i Union Oropeo pa ban lanta i pone riba pia e sektor di produkshon di kuminda. LVV ta probando esaki, tin krio di galiña ku ta probando esaki. Tin diferente proyektoinan di hòrtikultura ku ta prueba ku por. Nos tin awa resiklá i nos tin awa rondó di nos isla pa no kaba nunka. Teknologia t’ei, nos tin profeshonalnan i nos tin un grupo di trahadó ku nos por empleá den trabou sosial, Nos ta disponé di un zona ekonómiko ku ta kore di nort di Boneiru te na Saba bank i ku Henk Kamp a deklará 10-10-10 anochi ku a hasi Ulanda 92 mil kilometer kuadrá mas grandi ku tur e rikesa di kuminda i mineral den dje. Kiko nos ta warda.

FUENTE: USIBO/ LIVE99FM