FREADYEN MICHIEL A BIAHA PA MERKA, KAMINDA E TA BAI STUDIA I SIGUI KU FUTBÒL.

Kralendijk, – Fin di siman ku a pasa, Freadyen Michiel a biaha pa Merka, kaminda e ta bai studia i sigui ku futbòl. Inga Tijn-A-Sie, miembro di komishon AtleticoFlamingo Youth a papia tokante Freadyen, kon el a yega pa bai studia i trein e deporte di futbòl ku e gusta masha. Ta trata di e promé hóben di Boneiru ku ta bai studia na Merka i trein futbòl aya. Inga: “Na aprel 2023 S.V. Atlético Flamingo Youth a organisá un klínika pa su hungadónan.

Na e okashon a bini spesial for di Merka, coach Alex Pama di Life University i coach Stephen Magenny di Georgia Gwinneth College, pa duna e klínika i interkambiá nan eksperensia ku nos coachnan. Durante di e klínika aki un hungadó di nos U17, Freadyen Michiel, a keda di scout pa coach Alex Pama i el a logra haña un scolarship na Life University. Durante e mes un aña, na luna di òktober, komishon di Flamingo Youth i su coach Terrence da Costa Gomez, a haña un invitashon pa bai konosé e universidat. A biaha pa Atlanta pa asina bishitá diferente college i universidat pa mas oportunidat i kolaborashon. Di e manera aki, Freadyen i algun hungadó mas, a haña e chèns pa eksperensia e bida di un studiante na Life University i a firma mes ora un kompromiso ku Life university. Miembronan di komishon a traha duru i a hasi tur preparashon pa Freadyen por biaha awe 17 ougùstùs, pa Life University. Freadyen ta bira e promé hungadó di Atlético Flamingo, ku a haña e chèns, pa bai studia i hasié huntu ku su deporte faborito.

Nos lo sigui traha duru pa mas hungadó logra haña e chèns pa bai studia i alabes hunga futbòl. Nos ke yama danki na komishon di S.V. Atlético Flamingo Youth i INDEBON, ku ta sigui traha tur dia di nobo, pa nos muchanan di Boneiru.” Euron Rosario di e tim di Flamingo, a entrega Freadyn en ènvelòp di regalo pa e kuminsá su promé temporada aya na Merka. Mama di Freadyen a bisa ku e ta kontentu ku e yu ta bai sigui studia afo i hasi loke e gusta hasi, esta futbòl. E ta deseá e yu tur klase di bon deseo.

FUENTE: FITTIPALDI/LIVE99FM