AINDA TA BIBA UN PENSAMENTU TOTALMENTE ERONEO BOU DI UN GRUPO GRANDI DI TRAHADÓ AKI NA BONEIRU KU TA PERHUDIKÁ NAN I NAN FAMIA EN GRANDE, DI AKUERDO KU NORWIN NOCHI WILLEM.

Kralendijk, – E pensamentu ei ta ku tin trahadó ta kere ku nan mester informá nan dunadó di trabou ku nan kier bira miembro di un sindikato. Na e otro un banda tin dunadó di trabou di mala fe ku ta laga nan trahadó kere ku e trahadó mester di pèrmit pa bira miembro i ku si e bira miembro e dunadó di trabou por tuma represaya, entre otro kita nan for di trabou. Awe un biaha mas mi ta bai duna kada trahadó ku lesa e kolumna aki e instrumentonan den nan man ku ta protehá nan kontra tur dos di e pensamentunan eroneo ei i mi kier invitá nan pa kita for di e pensamentunan malu ei i libra nan mes i aktua komo hòmber i muhé liber den nos estado di derecho demokrátiko i kaminda nan ta protehá tantu pa leinan lokal komo leinan internashonal basá riba derechonan fundamental humano.

I lagami ta honesto, boso pensamentu i aktuashon eroneo ta strobando un desaroyo sano na Boneiru riba merkado laboral kaminda mester reina hustisia, kaminda no mag di tin ni desrkiminashon ni niun sorto di intimidashon pa bo ehersé bo labor i gana bo pan di kada dia. Ta boso ku e pensamentu eroneo ei ku boso ta kana kuné ta pone ku tin dunadó di trabou ta kere ku nan por hasi loke nan kier i ku ningun hende ni instansia no por mishi ku nan. Ta boso miedu sin ningun fundeshi ta yuda krea abuso kontra trahadó i ku no tin rèspèt pa boso mes komo trahadó. Ta e aktitut di kobardia ei ta pone ku tin dunadó di trabou no ta kumpli ku nos lei- i reglanan di trabou i ta paga trahadó  mitar salario ora nan ta haña ta bon, no ta paga overtaim manera lei ta preskribi, ta pone boso firma kòntraktnan ku ta solamente den bentaha di nan, ets ets. Sindikalismo por yuda solamente ora trahadó ta uní i organisá den sindikato. Boso mes ta eksperenshá ku baimentu instansianan di gobièrnu tampoko ta yuda, ya ku forsa di trahadó ta sintá den e forsa di su union.

Ta esei ta hasié fuerte i por trese e balansa di poder.

Ta pései lesa ku atenshon e loke ta bai sigui i no duda mas i awe mes abo si abo mes tuma e desishon ku bo ta bira miembro di un sindikato. I si kada un di boso tuma e desishon aki awe, den ménos ku un luna boso for forma e mayoria na e kompania ku boso ta traha i mesora boso lo tin protekshon di sindikato ku lo ta e partner na mesa pa atendé boso kondishonnan i sirkumstansianan laboral den un forma kolektivo. Dunadó di trabou pa lei mester atendé ku e sindikato i no ku abo personal i individual mas pa loke ta bo kondishonnan di trabou. Mesora sindikato lo pone rèspèt na boka di trabou pa kada un di boso i lo para kulakier abuso ku ta tuma lugá na e empresa. I boso mes por informá boso kaminda e trahadó ta organisá den un sindikato no por tin kuenta di paga mitar salario, no por tin kuenta di no paga overtaim manera lei ta preskribí. Pues despues di lesa e kolumna aki awe e desishon ta na ABO pa bira miembro. Ata bo instrumentonan.

Artikulo 8 di nos konstitushon ta dunabo e derecho legal pa organisá bo mes den un sindikato. Bo no mester informá bo dunadó di trabou nada. Tabo privasidat i dunadó di trabou no tin nada di haber ku esaki. E dunadó di trabou hamas por prohibí abo pa bira miembro. Abo ta protehá pa esaki tantu pa leinan lokal komo pa leinan internashonal i tambe tratadonan manera Organisashon Internashonal di Labor. Ningun dunadó di trabou por tuma represaya kontra bo pasobra bo ta òf bo kier bira miembro di un sindikato. Esaki lo ta deskriminashon i violashon di derechonan laboral fundamental. Trahadónan tin e derecho pa sin miedo bira miembro i partisipá na aktividatnan sindikal. Awor ta na abo pa tuma e desishon. Bo ta liberá bo mes òf bo ta keda biba bou di miedo i sigui akseptá abuso i eksplotashon.

Unda bos di trahadó ta den turismo. 25% di nos ekonomia ta dependé di turismo. Turismo ta dependé pa un gran parti di e trahadó den e sektor aki ku tin ku brinda e servisio, ku ta forma un parti esenshal di e produkto “Boneiru”. Sinembargo ki ora ta papia di turismo òf ta organisá eventonan turistiko ta solamente esnan ku ta representá e kapital, ku ta doñonan di fasilidatnan turístiko ta ser invitá. Nunka bo ta mira representashon di e motor tras di e industira ku ta e trahadó ku ta hasi kamber limpi, ku ta enakrgá ku mantenshon, ku ta risibí e turista, ku ta sirbi e turista den tur aspekto, ku ta transportá e turista, enfin ku semper e turista ta den un òf otro forma den knoitakto kuné durante su estadia na Boneiru.

E pregunta dikon tin un simpel kontesta i esei ta ku e trahadónan den e sektor aki pa e mesun motibunan ku mi a menshoná te ainda no ta organisá den un sindikato i ku pa tal rason tur dia di nobo ta reklamá individualmente nan kondishonnan i nan sirkumstansianan di  trabou. Tin mas sektor kaminda e situashon ta igual, pero awe mi a menshoná e sektor turístiko pasobra e ultimo dianan aki atrobe ta e sektor aki ta den notisia i loke nos ta tende ta kuantu turista ta bin, kuantu e ta gasta, kuantu e ta paga pa kamber, kon doñonan di hotèlnan por hasi mas ganashi for di turismo, pero niun palabra kon ta atendé ku e HENDE, e TRAHADÓ den e sektor aki pa alsa su kalidat i pofeshonalidat di trabou i kon ta mehorá su kondishonnan di trabou i kuné su kondishon di bida i di su famia. Loke si nos ta tende ta ku ekonomia di Boneiru a krese ku 23% pero ku apénas esaki tabatin influensha riba mehorashon di kalidat di bida. Bieunan sa bisa, si bo mira un sker den bo  muraya, laga chèk bo fundeshi.

FUENTE: USIBO/LIVE99FM