NOS ZJILEA SU TEMA DI E SIMAN AKI TA ” LAGA E KANDELA DI SAN JUAN I SAN PEDRO PURIFIKA BO ALMA”

Kralendijk, – E fiesta di San Juan i San Pedro ta wòrdu selebrá riba dia 24 i 29 di juni respektivamente. Riba e fechanan aki tur hende ku tin e nòmber Juan i Pedro òf ku tin nòmber ku a wòrdu derivá for di esaki manera por ehèmpel Juanita, Johana, Wancho, John, Pedro, Peter òf Petra ta risibí bishita na kas. “Hey Nòchi! E hendenan ta na kaminda pa bini serka bo”.”Bisa nan mi ta kla pa nan. Nan por yega numa”. Sèmper tin un hende ku ta kana mas dilanti pa avisá e doño di kas ku e grupo di musikonan ta na kaminda. E tokadonan ku ta hasi uso di kuèrdè, esta un kuarta òf kitara, ta esunnan ku ta na kabes di e grupo. Na yegada e doño di kas ta ofrese nan repa, dèdè, koffie i rom. Na final tin e bulamentu di kandela ku ta tuma luga pa purifikashon di alma.

Djasabra awor 29 di yüni lo bai tin e siguiente edishon di e evento kultural ‘Nos Zjilea’ na Mangazina di Rei ku e tema “Laga e kandela di San Juan purifika bo alma”.Mainta 10’or nos lo kuminsa ku e podcast’ ’Butishi’ den kual lo kombersa ku invitadonan tokante di diferente tema di e Nos Zjilea aki. E podcast  lo wòrdu transmití tambe via di Facebook, Youtube, radio Voz di Boneiru 94.7 FM i na MiTV Telbo Kanaal 74 VdB TV.

E tradishon di e selebrashon di San Juan i San Pedro ta unu ku ta tuma luga pa dekadasnan kaba. Un hende ku ta hopi envolví den e tradishon aki ta Sr. Freddy St Jago. Freddy lo konta kiko tur e doñonan di kas ta prepara pa e selebrashonnan aki i kon e serenadanan ta bai. Sr. Wesley “Wewe” Sintjago lo splika ki balor e tradishon aki tin pa nos herensia kultural i dikon tin ku konservá esaki pa asina e no bai pèrdi. Alabes e lo konta tokante di nifikashon di diferente kansionan ku nos ta tende den e temporada aki manera entre otro “Buchi Marti”, “Madua Ban Kas”, “Dina Baro” i varios otro mas. Bin skucha e bunita storianan tras di e kantikanan aki.

Un di e personanan ku tur aña di nobo ta haña bishita duranta di e periodo di Juan i Pedro ta Sr. Juan Nochi Coffie. E lo bin komparti ku su eksperensia ku bulamentu di kandela durante di e selebrashon na su kas. Si bo ta bin pa bula kandela na Mangazina di Rei wak pa bo paña no kima.

Papiamentu ta dushi pero tin biaha ora ku bo no sa un palabra na papiamentu mes, bo ta dal un hulandes òf ingles den dje. Pa stimula papiamentu di papiamentu mas tantu Mangazina di Rei huntu ku Akademia Papiamentu ta bai tene e konkurso yama  “#retapapiamentu” un biaha mas. Bin partisipa i yuda nos alsa nos dushi papiamentu.

Dimes Marshe Krioyo no por keda afo ku su produktonan fresku i lokal manera ku bo a kustumbra kune. Kushina ta habri for di 10’or di mainta pa keinta e stoma ku un dushi sòpi. Pa mèrdia bo por haña diferente platonan krioyo i un dushi grill. Tur esaki den un dushi ambiente ameno ku presentashonnan “LIVE” di e banda nobo “Tio” i tambe “Ritmiko Timon”.
 E pareha bailado “Duo Mirasol” no por keda afo ku nan bailenan di kita sombre.

Ban brasa, selebrá i kompartí nos dushi kultura na ‘Nos Zjilea’, é evento kultural di tur luna, djasabra awor 29 di yüni di 10 ‘or di mainta te ku 3 ‘or di atardi na Mangazina di Rei. Entrada ta gratis. Pa un programa mas detayá por bishita e Facebook Fanpage di Mangazina di Rei.

𝑩𝑹𝑶𝑵: 𝑴𝑨𝑮𝑨𝒁𝑰𝑵𝑨 𝑫𝑰 𝑹𝑬𝑰/𝑳𝑰𝑽𝑬99𝑭𝑴