AMES FINIES: BONEIRU MESTER DI PROTEKSHON, NO INDEPENDENSIA, SINO RESPONSABILISASHON DI HULANDA

Kralendijk, – Resientemente riba  9 di ougùstùs, mientras nos ta konmemorá Dia Internashonal di Pueblonan Indígena di Mundu, ami, James Finies, no ta lucha pa Boneiru bira independiente for di Hulanda. Mi lucha ta pa pueblo di Boneiru ta protehá bou di Karta di Nashonan Uní i Artíkulo 73, komo un Teritorio Sin Propio Gobernashon (NSGT), meskos ku nos rumannan na Anguilla, Bermuda, Turks and Caicos, i otro NSGT-nan den Karibe i otro parti di mundu.

Mi lucha semper tabata pa protekshon di pueblo di Boneiru—nos derechonan, nos tera, nos kultura, nos idioma, nos identidat i nos futuro.

PAKIKO MI A PROTESTA PA 222 DIA: Hopi Boneriano no a komprondé kompletamente pakiko, kuminsando na 2014, mi a protestá durante 222 dia, eksigiendo un referendum. Pueblo di Boneiru tabata meresé e derecho pa disidí si nan tabata di akuerdo ku e relashon konstitushonal ku tabata wordu imponé riba nan.

Ora ku finalmente e referendum a tuma lugá na desèmber 2015, a puntra pueblo di Boneiru si nan tabata di akuerdo ku e status konstitushonal aktual di Boneiru. 65.5% a vota NO.E resultado ei mester tabata un mensahe poderoso.

E KAMBIONAN KU MI TABATA ATVERTI PA NAN: Awe nos por mira hopi di e preokupashonnan ku a motivá e lucha ey: pobresa i e kosto haltu di bida; infrastruktura inadekuá; kambionan den nos sistema di enseñansa ku ta afektá nos idioma lokal i identidat; i limitashonnan kontinuo den kuido di salú.

Boneiru ainda ta enfrentá reto grandi den su sistema di kuido di salú, i hopi hende a pèrdè konfiansa den e servisio debí na desilushonnan repetí ku a kousa hopi sufrimentu i tristesa.

Esakinan no ta argumentonan pa independensia. Nan ta argumentonan pa mas protekshon, igualdat i gobernashon responsabel.

INDEPENDENSIA NO TA E SOLUSHON: Boneiru ta un isla chikí ku un ekonomia vulnerabel i rekursonan limitá. Independensia no ta e solushon. Loke nos mester ta un relashon ku Hulanda basá riba igualdat, respet, protekshon i e derecho di pueblo di Boneiru pa tin un bos signifikativo den desishonnan ku ta afektá nan futuro.

Autodeterminashon no mester wordu interpretá automátikamente komo independensia. Fundamentalmente, e ta trata di e derecho di un pueblo pa partisipá libremente i di un manera signifikativo den determiná nan futuro polítiko, ekonómiko, sosial i kultural.

PROTEHA PUEBLO MESKOS KU NOS TA PROTEHA BONEIRU: Nos ta protehá nos rifnan di koral. Nos ta protehá nos flamingonan,turtuga, palu di mangel, karko, nos burikunan, asta raton di anochi, i nos medio ambiente natural, pasobra nos ta komprondé ku nan ta presioso i ta forma parti di loke ta hasi Boneiru úniko.

Pueblo di Boneiru, nos kultura, nos idioma i nos identidat ta meresé e mesun determinashon i kompromiso pa protekshon.Desaroyo nunka mester sosodé na kosto di e pueblo ku ta yama e isla aki nan kas.

HULANDA MESTER KUMPLI KU SU RESPONSABILIDATNAN: Hulanda tin responsabilidatnan bou di derecho internashonal di derechonan humano pa ku pueblo di Boneiru.P’esei, nos demanda no ta pa Hulanda bandoná Boneiru. Nos demanda ta pa Hulanda kumpli ku su responsabilidatnan i garantisá ku e derechonan, dignidat, identidat kultural i futuro di pueblo Boneriano ta wordu protehá.

Nos ta buska un relashon di akuerdo ku Karta di Nashonnan Uní, Konvenionan di Derechonan Humano, Tratadonan Internashonal i Derecho Internashonal, den kua Boneiru no ta simplemente wordu goberná, sino ta wordu skuchá, respetá i protehá.

Boneiru mester di protekshon, igualdat i respet.