UN KAPÍTULO POLÍTIKO NOBO PA BONEIRU: JAMES FINIES LO LANSA OFISIALMENTE PARTIDO PUEBLO PROGRESIVO RIBA 6 DI SEPTEMBER

Kralendijk, – Riba 6 di September, Dia di Boneiru, James Finies lo lansa ofisialmente Partido Pueblo Progresivo (PPP), presentando un vishon nobo pa Boneiru, basá riba integridat, liderazgo kompetente i sirbi I pone e pueblo di Boneiru promé.

E lansamentu di PPP ta mas ku solamente introdukshon di un otro partido polítiko— e ta di pueblo pa pueblo. E ta e kuminsamentu di un moveshon dediká na atendé e luchanan I desafionan ku pueblo komun di Boneiru ta enfrentá tur dia.

Pa dékadanan, Boneiru a keda goberná pa hopi di e mesun figuranan polítiko bou di diferente nomber di partido. Tur e partidonan aktual ta sali for di e mesun grupo di lidernan resiklá. UPB a sali for di Partido Demokrát, MPB a sali for di UPB, i formashonnan polítiko mas resien manera M21 i e partido nobo di Nina Den Heyer tambe a sali for di MPB, mientras ku Partido Santana a sali for di PHU. Esaki ta representá, resiklashon di e mesun liderazgo polítiko, no un kambio berdadero. Apesar ku e mesun lidernan polítiko den tur e partidonan aktual a risibí oportunidat durante e últimonan 15 te 20 aña pa goberná, hopi suidadano ainda ta enfrentá kosto di bida ku ta subi, hur I bibienda mas haltu, kuenta di awa i koriente mas karu, kuminda ku ta bira mas kostoso i un nivel di pobresa ku ta sigui krese.

Pueblo di Boneiru meresé mas ku promesanan kada elekshon. Nan meresé liderazgo sin korupshon ku ta duna resultadonan, ku ta responsabel i ku tin un vishon kla pa futuro.

Boneiru mester di otro tipo di liderazgo—liderazgo basá riba integridat, eksperensia profeshonal, bon maneho i konosementu finansiero komprobá. E background di James Finies den banko komersial, su sakrifisio kontinuo i dedikashon pa bienestar sosial di pueblo di Boneiru, su eksperensia den maneho struktural, su ret internashonal, i e konfiansa ku e a gana di miles di klientenan durante su karera den banko, NGO’s, sosiedat sivil, deporte i di e pueblo di Boneiru, ta puntonan fuerte ku por yuda krea un Boneiru mas fuerte i mas próspero.

E partido lo sigui defendé interesnan di Boneiru na nivel internashonal, inkluyendo e trajekto pa pone Boneiru riba Lista di Teritorionan Sin Propio Gobernashon di Nashonnan Uní, komo parti di su vishon mas amplio pa protehá e derechonan i futuro di e pueblo Boneriano.

Durante e lansamentu ofisial tambe lo presentá e Manifesto preliminar di PPP, den kual lo presentá propuestanan práktiko pa atendé e desafionan mas urgente ku Boneiru ta enfrentá, inkluyendo: Bahá e kosto di bida, Kasnan, bibienda I hur pagabel, Bahá e preis di koriente i awa, Kresementu ekonómiko i kreashon di trabou, Mihó enseñansa i salubridat, Protekshon di kultura, idioma i identidat di Boneiru, Bon gobernashon, transparensia i responsabilidat, Oportunidatnan pa hóbennan i sosten pa nos grandinan, Desaroyo ekonómiko sostenibel ku ta benefisiá pueblo di Boneiru, I hopi otro asuntonan importante ku ta afektá e siudadanonan di Boneiru.

Esaki ta un yamada na tur siudadano di Boneiru ku ta kere ku kambio ta posibel pa djoin i uni ku nos den e moveshon ku ta fokus riba krea un mihó futuro.

Polítika mester ta pa sirbi pueblo—no pa mantene poder. Si bo ta kere ku Boneiru meresé mihor, merese un liderazgo honesto, solushonnan práktiko i un gobièrnu ku ta traha pa su pueblo, e ora ei riba 6 di September, nos e pueblo, huntu, lo kuminsá un kapítulo nobo den historia di Boneiru.”

Futuro di Boneiru ta pertenesé na su pueblo. E tempu pa kambio ta awor.