KORSOU: BIENTU FUERTE ÚLTIMO TEMPU

Willemstad,- Área di Laman Karibe pa algun siman tin di aber ku bientunan bastante fuerte.

Tur esaki ta debí na un diferensia den preshon di aire entre di un área di preshon haltu riba Osean Atlántiko i un área di preshon abou riba e parti nortwèst di Colombia. Durante ku El Niño ta desaroyá, e área di preshon abou riba Colombia ta ser alterá. Aktualmente esei ta sosodiendo i esei ta kondusí na un kambio den preshon di aire na Colombia.

Pa e motibu aki Servisio Meteorológiko Kòrsou a emití vários boletin spesial riba kondishon di laman brutu debí na e régimen di bientu fuerte den área di Laman Karibe.

Meteo a registrá bientunan ku un velosidat di alrededor di 35 km/ora ku rafaganan di mas o ménos 50 km/ora. Tur esaki ta debi na un diferensia den preshon di aire kual ta mas grandi ku normal

Konforme datonan klimatológiko di Meteo, ta indiká ku durante di luna di mei normalmente bientu sa supla ku velosidat di alrededor di 33 km/ora i e ráfaga di mas fuerte ku Meteo a registrá tabata di 66km/ora.

Servisio Meteorológiko Kòrsou ta premirá un normalisashon den kondishon di forsa di bientu durante komienso di e luna di yüni.

Meteo ta siguí vigilá e situashon di tempu 24/7.

FUENTE: METEO KORSOU/LIVE99FM