HEI , ABO TRAHADÓ, BO KONOSÉ BO DERECHO ? PARTI 2.

UN DI E FAYONAN GANDI RIBA FLUR DI TRABOU TA NO KUMPLI KU E REGLANAN DI SEGURIDAT:

Kralendijk,- Seguridat na boka di trabou ta krusial i neglishá esaki por tin konekuensianan hopi serio pa abo i bo koleganan. Perkurá ku abo ta konosé tur e reglanan di seguridat i tuma nan na serio. Huntu ku e otro fayonan ku a menshoná siman pasá nos por i mester evitá esakinan dor di eksigí ku ta respetá bo derechonan komo trahadó i ku bo ta haña un trato hustu. Papia i pidi pa respetá bo derechonan ta algu masha normal kontal bo tambe ta hasiele den un forma respetuoso.

E konseho ku sindikalismo kier dunabo ta pa bo keda na  altura di bo derechonan i ata algún tep pa bo semper keda rekordá. Bo tin derecho riba un salario husto, ambiente di trabou sigur i salú i sufisiente tempu di sosiego. Komo miembro di sindikato bo tin shòpsteward i e sindikato mes pa lanta para ora ku dunadó di trabou no ta kumpli. Sea alerta ora bo konstatá violashon di bo derechonan. No duda ni tin miedo pa tuma akshon. Mèldu esaki serka bo shèf direkto òf buska konseho si ta nesesario. Ta masha importante pa na promé lugá bo mes sali pa bo derechonan. Dokumentá tur kos, traha un rapòrt i nota fecha, ora, nòmber di esnan envolví i deskribí e situashon mas detayá posibel. Semper esaki ta di importansia dado kaso bo mester di prueba. Komunikashon ta importante. Keda komuniká den un forma habrí ku bo dunadó di trabou i koleganan. Kònbersá riba preokupashonnan ku bo tin durante trabou i trata na yega na un solushon konhuntamente. Kòrda semper ku bo derechonan komo trahadó ta importante i ku bo tin derecho di ser tratá honesto i hustu.

Sindikalismo ta balorá abo komo trahadó komo un di e pilarnan importante pa karga desaroyo di nos isla. Ta abo komo trahadó ta maestro(a) ku ta eduká nos yunan, ta abo ta traha den kuido, tabo ta e lidernan despues di ora di skol ku ta akapará nos muchanan, ta abo ta kosechá salu for di den saliña pa nos eksportá, ta abo ta para traha 8 ora pa drecha i asfaltá nos kamindanan, ta abo ta e polis ku ta perkurá pa tin seguridat i protekshon di nos komo hende i nos propiedatnan, ta abo ta den konstrukshon ku ta lanta tur e edifsionan riba nos isla, ta abo ta traha den gobièrnu pa duna komunidat un kantidat di servisio. Ta abo ta e shofùr di bùs ku ta transportá nos, ta abo ta sirbi nos turistanan ku nan ta keda kontentu pa regresá, ta abo ta traha den mantenshon i housekeeping, ta abo ta den kompanianan di seguridat i ta abo ta pará 8 ora tras di tonbank den pakus, den supermerkado i otro negoshinan dunando servisio. Pues nos ta dunabo no solamente e rèspèt i rekonosimentu. Sindikalismo ta brindabo tambe e protekshon kontra abuso, eksplotashon i violashon di bo derechonan. Sindikalismo ta sinta na mesa i yega na akuerdo pa garantisá bo derechonan ku nos a papia e dos simannan aki riba dje esta; salario husto, ambiente sigur i salú, sufisiente ora di sosiego(fakansi) kumplimentu ku leinan laboral; krea oportunidat pa bo krese i desaroyá personal den e kompania. Tur esakinan i mas sindikalismo ta hasi pabo. Nos ta hasi esaki huntu kubo, dor di bo i pa abo. Uniko kos ku nos ta pidi ta uni i afiliá bo mes na sindikato. Huntu ku gobièrnu  i dunadónan di trabou  nos ta forma e balansa hustu komo e tres pilarnan ku tin ku karga e desaroyo sano, hustu i duradero di nos komunidat. Ta p’esei sindikalismo t’ei pa sali na interes di abo komo trahadó i bo famia. Pa  e siman aki nos lema ta un ekspreshon di Barack Obama ku ta bisa:
“Ta sindikalismo a yuda pa sigurá asina tantu kondishon laboral ku awe nos ta konsiderá komo normaI — 40 ora pa siman, sueldo mínimo, fakansi, seguro di malesa, di desgrasia, penshun, trato médiko i plannan di retiro, tur ta logronan di lucha sindikal. Sindikalismo ta e arkitekto di protekshon modèrno pa trahadó”

FUENTE: NORWIN NÒCHI WILLEM