PENALIDAT DISPROPORSHONAL PA E ASINA YAMÁ ‘BURAKU DI ESTADIA’

Kralendijk,- Fundashon Union di Imigrantenan Boneriano (FUIB) a indiká diferente biaha kaba ku e penalidat pa un asina yamá ‘buraku di estadia’ (Hulandes: ‘verblijfsgat’) ta klaramente disproporshonal.

Den nos sistema di gobernashon y den derecho penal, e prinsipio di proporshonalidat ta hopi importante. Kualkier desishon di gobièrnu mester kuadra ku ‘prinsipionan general di hustisia’.
E prinsipio di proporshonalidat ta un di e prinsipionan general di hustisia aki.

A base di art. 9 di Lei tokante Hurisdikshon Atministrativo, Korte por husga si un desishon di gobièrnu ta kuadra ku prinsipionan general di hustisia, sí of no. Si Korte ta husga ku un desishon di gobièrnu NO ta kuadra ku un di e prinsipionan aki, Korte por anulá e desishon. 

FUIB tin intenshon pa pidi Korte pa hasi esei. FUIB tin kontakto ku diferente imigrante kaba ku tin mas ku 10 aña bibá na Boneriu sin por a haña un pèrmit di estadia permanente. E motibu ta ku dos biaha nan tabatin un asina yamá ‘buraku di estadia’, es desir algun dia of siman of luna di estadia ilegal entre dos pèrmitnan konsekutivo. Hasta un solo dia di ilegalidat por kousa ku un imigrante tin ku warda 4 aña of mas pa e por haña su pèrmit di estadia permanente.

E penalidat ei ta klaramente disproporshonal.

E imigrantenan aki kier hiba un kaso y FUIB lo sostené nan. Pero promé ku lo hasi esei, FUIB a aserká e Ofisina di Imigrashon (IND) pa sinta na mesa pa wak si por yega na un solushon amikal pa e problema aki. IND a primintí di lo tuma kontakto ku Hulanda pa wak kiko por hasi pa solushoná of suavisá e disproporshonalidat aki. A palabrá ku FUIB lo warda 4 luna pa wak si e diálogo aki lo por tin un of otro resultado positivo y konkreto. Mientrastantu 3 luna a pasa kaba sin niun resultado. Ta p’esei FUIB ta hasi un yamada públiko na imigrantenan ku tin mas ku 10 aña kaba sin por a haña nan pèrmit permanente, pa tuma kontakto ku FUIB. 

Por tuma kontakto ku direktiva di FUIB, Sr. Carlos Jimenez (567 0760) presidente of Sr. Heriberto Salazar (785 1673) sekretario of abogado Bijkerk na number di telefòn of whatsapp: 796 2650.

Ta duel nos pa anunsiá ku FUIB mester kanselá su Konsultorio hurídiko grátis riba djasabra pa motibu di kebrante di salú. Pero kualkier persona ku kier partisipá na e kaso over di e penalidat disproposhonal di un ‘buraku di estadia’ por tuma kontakto ku nos via telefòn. Mas tantu persona ta partisipá, mas tantu forsa e kaso lo tin. Esaki ta un momentu ku imigarntenan tin ku uni. No pa grita y hasi bululú, pero pa para pa hustisia y derecho via di diálogo of Korte.

FUENTE:PA FUNDASHON ‘UNION DI IMIGRANTENAN BONERIANO’ (FUIB),