999 DIA DI  LUCHA INKANSABEL: JAMES FINIES TA PARA FIRME NA NASHON UNÍ PA FUTURO DI BONEIRU

Kralendijk,- 9 di februari 2026, ta marka 999 dia di lucha internashonal sostení pa James Finies, defensor di derechonan humano, Boneriano indigino i líder di Partido Pueblo Progresivo, den e komunidat internashonal i sistema di Nashon Uní.

Pa 999 dia, Finies a traha sin kansa pa pone atenshon mundial riba e echo Den Haag a kita de manera unilaterál e derecho di Boneiru pa autogobernashon, imponiendo un struktura konstitushonal Hulandes—sin respetá referéndum, mandato demokrátiko, I sin konsentimentu liber, previo i informá di e pueblo. Durante e 999 dia aki, Finies a sigui trese atenshon internashonal riba e status polítiko no resolví di Boneiru i e konsekuensianan pa derechonan humano ku a sigui despues di e inkorporashon unilaterál di e isla den e struktura konstitushonal Hulandes na 2010.

Durante e periodo aki, James Finies a partisipá aktivamente den proseso di Nashon Uní na New York i Ginebra, a interaktua ku diplomátnan, ekspertonan legal, organisashonnan di komunidat sivil i institushonnan internashonal, a papia den diferente reunionnan ofisial di Nashonan Uni,  inkluí reunionnan di Asambléa General, i a kontribuí na eventonan paralel, briefingnan i inisiativanan formal. Un pilar sentral di e trabou aki ta e yamada pa pone Boneiru bèk na lista di protekshon di Nashon Uní di Territorio No Autonomo, restablesiendo supervison internashonal i obligando gobiernu Hulandes pa raporta di manera transparente riba e desaroyo di Boneiru.

Durante e 999 dia aki, James Finies a tene kontakto direkto, a dirigi palabra òf a tene dialogonan ku Presidentenan di entre otro, Repúblika Dominikana, Chile, Cuba, Panamá, Surinam i Guyana; Promé Ministernan di Belize, Barbados, Bahamas, St. Kitts y Nevis, St. Vincent and the Grenadines, Grenada, Jamaica i Trinidad y Tobago; Premiernan di British Virgin Islands, Anguilla, Montserrat, Bermuda i Polinesia Franses; tambe ku Ministernan di Asuntunan Externo I mas.

Tambe ku e Presidente di Asambléa General di Nashon Uní, e Sekretario-Generál di Nashon Uní, Sekretario General di NATO, e Sekretario-Generál di CARICOM i di Organization of Eastern Caribbean States (OECS).

Otro logronan historiko ta e solidaridat risibí for di organisashonnan regional manera OECS, MERCOSUR, CARICOM i PARLACEN, ku a elevá kaso di Boneiru den sirkulonan diplomátiko Karibense, Latino-Amerikano i global, i a konfirmá ku situashon di Boneiru no ta un asuntu interno, sino parti di e agenda global di deskolonisashon ku ainda no ta kompletá.

“999 dia no ta un símbolo—ta prueba di persistensia, responsabilidat i resistensia,” segun James Finies, ku a duna bos na un pueblo ku no ke keda invisibel i ku ta eksigí ku lei internashonal i mekanismonan di Nashon Uní funshoná manera nan mester funshoná. A pesar di preshon polítiko, marginalisashon i riesgonan personal, su lucha ta reflehá e lucha mas amplio di Boneiru pa autodeterminashon, dignidat, preservashon kultural, hustisia klimátiko i un mihó kalidat di bida, mientras e ta hasi yamada na e komunidat internashonal pa envolvi, skucha i aktua, ya ku e situashon di Boneiru ainda no ta resolví.

James Finies ke gradisí di kurason e pueblo di Boneiru ku ta sigui konfia den dje i ku e a duna speransa, uní pa medio di e speransa komun di traha un futuro digno i hustu pa nos muchanan i generashonnan ku ta bin, i for di e konvikshon ku pone Boneiru bek riba e lista di Nashonan Uni ta loke ta korekto segun lei internashonal i prinsipionan di hustisia.

FUENTE: BONAIRE HUMAN RIGHTS ORGANIZATION