DESPUES DI 12 AÑA NÒCHI WILLEM A TUMA DESPEDIDA KOMO MIEMBRO/BOSERO DI USIBO DEN E PLATAFORMA TRIPARTIT DIALOGO SENTRAL DI BONEIRU.

Kralendijk,- Sr. Willem a para na kuna di e plataforma aki, despues ku na 2012 riba su inisiativa a funda Union Sindikal Boneriano ku a reanudá selebrashon di Dia di labor riba 1 di mei ku partisipason di tur sindikato na Boneiru.

Tabata riba invitashon di sra. diputado Serfilia Janga ku a kuminsá organisá e plataforma di konsulta ku den kuminsamentu a keda presidí pa sres. Roland Ignacio komo presidente i sr. Bicho Justiana komo sekretario.

E plataforma a konosé diferente presidente despurs den personanan manera Herbert Domacasse i George Soleana i na 2018 a pidi yudansa i asistensia di ministerio di asuntunan Sosial i di Labor pa reorganisá e plataforma.

Esaki a tuma lugá a base di konsultanan intenso pero semper den e espiritu di e konvenshon di ILO, kual ta e e organisashon Internashonal di Labor. Di 2019 te awor e Dialogo Sentral a traha a base di un kuadro di maneho entitulá Un futuro briante basá riba un maneho komun 2020-2023, den kua kolektivamente e tres partnernan, gobièrnu, organisashon di dunadónan di trabou i sindikalismo den USIBO ta karga e desaroyo sosial-ekonómiko ekológiko duradero i sostenibel di Boneiru.

E plataforma aki a funshoná te dia di awe i hasta a sirbi komo ehèmpel kon a base di rèspèt mutuo den diálogo ku argumentu e tres interesnan tòg ta haña otro den konsenso ora mester atendé e interes general di Boneiru. Banda di éksitonan lòs lòs, kualnan ta hopi por bisa ku orguyo ku e kulminashon di e Diálogo Sentral aki ta e Akuerdo di Kralendijk, ,kual akuerdo a kibra ku e kadena di pobresa i a lucha kontra e desigualdat ku tabatin e komunidat enprisoná.

Oumentonan supstansial riba tereno di seguridat sosial manera ònderstant, penshun di behes, di biuda(o), penshun di huerfano(á), kompensashon pa yu, supsidio pa akohida di mucha, diferente supsidio pa koriente, awa i internèt, supsidio pa kuenta di koriente, supsidio pa hür di viviendanan sosial a bira realidat pa asina garantisá un kalidat di bida mas digno pa esnan mas vulnerabel den nos komunidat.

Oumento drástiko di sueldo minimo basá riba e prinsipio di trabou mester paga ta otro logro históriko di trabounan duru, konsistente i determinante di e Diálogo Sentral i tur basá riba e prinsipio di negosashon kolektivo i no negosashon sektorial.

Komo muestra di apresio pa su kontribushon den e plataforma en partikular pero na komunidat di Boneiru en partikular, tantu gezaghèber John Soliano, na nòmber di Entidat Públiko i sr. Mervyn Steegers na nòmber di Diálogo Sentral a entregá un kariño na sr. Willem. I tabata sr. Willem ku na su turno a entregá na e presidio di Diálogo Sentral un sertifikado di apresio ku e logo forsa di e ekipo ta kada miembro individual ku ta forma e ekipo i forsa di e individuo ta e ekipo.

“ Mi ta bandoná e posishon, pero mi no ta bira lomba pa e lucha sindikal i tanten ku mi ta lúsido na mente, boso no a skapa dimi”. Ku e palabranan aki Nòchi a sera su diskurso.

USIBO ta deseá Nòchi tur kos bon i ta yama danki pa su kontribushon enorme den e mundo di sindikalismo aki na Boneiru.

FUENTE: USIBO/LIVE99FM