Redakshon
Willemstad – E montante ku Kòrsou ta gasta na kuido ta relativamente haltu. Na 2023, e montante aki tabata aproksimadamente 14,7 porshento di bbp, mas ku por ehèmpel Aruba (8,7%) i Sint Maarten (6,5%).
Esaki ta pone ku por gasta ménos riba otro terenonan di maneho, i ta kondusí na mas preshon di impuesto i prima. Manera CBCS a investigá, envehesimentu di poblashon ta pone ku e preshon riba e sistema di kuido ta oumentá ainda mas. Ta antisipá ku un solushon pa e problemátika serka CMC tambe lo kondusí na gastunan adishonal pa pais. P’esei, Kòrsou lo mester hasi eskohonan. Tumando medidanan awor pa oumentá efisiensia den kuido, por redusí e doló den futuro.
Segun IMF, Kòrsou ta gasta 20 biaha mas per kápita na servisionan di laboratorio ku e promedio den Karibe. Den e sektor aki tin sobrekapasidat, un problema ku aparentemente tambe ta okurí den otro partinan di e sektor di kuido. Anualmente, na Kòrsou ta skirbi un promedio di 20 resèpt pa persona, kompará ku 14 na Aruba i 12 na Hulanda. Ademas, frekuentemente ta usa remedinan kostoso di marka. Na Kòrsou, hopi hende ta hasi uso di kuido di emergensia (karu) miéntras nan tambe por a akudí na dòkter di kas pa risibí kuido.
Medidanan
Kòrsou por tuma medidanan pa hasi kuido mas pagabel. Ya kaba a hasi bastante análisis, awor ta importante pa implementá. E último añanan, muchu poko reforma efektivamente a ser implementá.
Manera a konsehá den Pakete di Pais, pa medio di fortalesementu di kuido primario lo por aliviá e preshon riba spesialistanan i hospitalnan. Reglanan mas estrikto pa referensia i un enfoke dirigí riba barionan ta importante den e marko aki. CMC ta indiká ku pa medio di fortalesementu di e funshon di gatekeeper di (ofisina di) dòkter di kas, por aliviá e preshon riba kuido di emergensia i evitá ku pashèntnan ku kehonan simpel ta risibí kuido innesesariamente kostoso. Den e marko aki, kolaborashon den kadena ta krusial.
Manera IMF ta indiká, por redusí e gastunan pa remedi. Por hasi esaki kambiando remedinan karu di marka pa opshonnan genériko mas barata den mas kaso. Pais ta purba di hasi esaki for di 2019 kaba, pero te awor no a logra. Revishon di e pakete básiko tambe por kontribuí na redukshon di e gastunan.
Prevenshon ta mihó ku kura. Dunando mas kuido preventivo i promoviendo un estilo di bida saludabel, por redusí e gastunan di kuido ainda mas. Presisamente konsiderando e envehesimentu di poblashon inminente, ta importante pa hende bira bieu den bon estado di salú.
Aktualmente, apénas tin insentivonan finansiero den e sistema di kuido. Esaki ta pone ku kuido ta aksesibel, pero na mes momentu tampoko tin freno riba konsumo di kuido. Manera IMF ta indiká, un oumento di e kontribushon propio pa esnan ku por paga esaki, por kontribuí na moderashon di konsumo di kuido.
E situashon finansiero di CMC aktualmente no ta stabil ainda. Cft ta urgi Kòrsou pa formalisá e solushon pa CMC mas pronto posibel, i pa duna klaridat tokante di e gastunan (adishonal).
Cft ta suprayá ku e medidanan aki ta kontribuí na mehorashon di e salú finansiero, tantu di e sektor di kuido komo di pais.
FUENTE: CFT/LIVE99FM
GIPHY App Key not set. Please check settings