HULANDA: CFT: “MESTER DI ENFOKE PA FORTALESÉ KAPASIDAT DI IMPLEMENTASHON”

Den Haag – Durante deliberashonnan ku e Kolegionan Ehekutivo di Boneiru, Sint Eustatius i Saba, Kolegio di supervishon finansiero di Boneiru, Sint Eustatius i Saba (Cft) a pidi atenshon pa e nesesidat di fortalesé e kapasidat di implementashon di e Entidatnan Públiko.

Esaki ta nesesario pasobra e presupuestonan di e islanan a oumentá konsiderablemente for di 2010. Cft ta enfatisá e importansia di un presupuesto realístiko, den kua – mas ku ántes – ta tene kuenta ku e límitenan di e kapasidat propio di implementashon. Prinsipalmente den kaso di Boneiru e ambishonnan no ta kuadra ku e implementashon di e presupuesto.  

Kapasidat di implementashon  

Kapasidat di implementashon ta mas ku e kapasidat so. E tambe ta rekerí gobièrnu stabil i prosesonan kla di tumamentu di desishon. Ademas, ta importante pa maneho finansiero ta na òrdu, pa asina atministrashon por hasi ahuste na tempu. Kreashon di sufisiente kapasidat di implementashon no ta tarea fásil, konsiderando e eskala di e islanan. Sinembargo, priorisashon sí ta yuda.

Cft a presentá su análisis tokante di e kapasidat di implementashon di e Entidatnan Públiko na e Kolegionan Ehekutivo i e Konsehonan Insular, loke a mustra e siguiente: 

Kapasidat di implementashon di Boneiru no ta sufisiente

E kapasidat di implementashon di Boneiru riba kasi tur área ta insufisiente. For di un punto di bista finansiero-ekonómiko, e kantidat grandi di pagonan spesial di kua e término a kaduká ta preokupá Cft, pasobra esakinan ta fondonan ku por keda rekuperá i p’esei nan no ta benefisiá pueblo di Boneiru. Banda di esaki, Cft ta mira un fuerte kresementu di e reservanan aloká i gastunan ku no a ser inkluí den un presupuesto adoptá. Ta importante pa Boneiru priorisá gobernashon stabil i fortalesementu di e kapasidat di implementashon den henter e organisashon. Ta un echo ku e poblashon a krese hopi, i e presupuesto a dobla den un plaso di sinku aña. P’esei, Kolegio ta komprondé e komplehidat di e tarea ku e sistema tin pa sigui e kresementu aki.

E mensahe sentral ku Cft a duna na Kolegio Ehekutivo ta: “Enfoká riba loke mester hasi, i hasi esaki adekuadamente!”, sino, na final e siudadanonan di Boneiru ta esnan ku ta keda perhudiká.

St. Eustatius ta riba bon kaminda pa ta ‘in control’

E kapasidat di implementashon di Sint Eustatius ta krese visiblemente. Cft ta konstatá ku den e aña pasá, Sint Eustatius a tuma pasonan grandi den mehorashon di maneho finansiero. Un logro importante ta e echo ku tokante di e kuenta anual pa 2024, Sint Eustatius a haña un deklarashon aprobatorio di ouditor, pa promé biaha. Banda di esaki, Sint Eustatius ta trata e reservanan aloká ku koutela. ​Esfuerso persistente i apoyo amplio riba tur área ta keda nesesario, pasobra e rekuperashon ta frágil i debí na e kantidat grandi di vakatura, e operashon di e aparato sivil ta keda vulnerabel. P’esei, e mensahe di Cft pa Sint Eustatius ta: “Kontinuá riba e kaminda pa ta ‘in control’”. 

Saba: kaminda un isla chikitu por ta grandioso 

E kapasidat di implementashon di Saba ta na òrdu pa mayor parti. Tin kontinuidat di kalidat riba posishonnan klave, tin disiplina presupuestario sólido i a duna deklarashonnan aprobatorio pa e kuentanan anual vários biaha. Por lo pronto, e isla BES mas chikitu ta esun ku ta logra mas. P’esei, e mensahe sentral di Cft pa Saba ta: “Keep up the good work!” 

FUENTE: CFT/LIVE99FM