ARUBA: EKSITOSO KOLABORASHON ENTRE TUR PAIS DEN REINO KONTRA KRIMEN DI ARMA DI KANDELA

Oranjestad,- Di 10 te ku 14 di novèmber 2025 analista, spesialista riba tereno di informashon i reshèrshi di tur e paisnan den Reino i Hulanda Karibense a traha huntu, den e mésun sala, riba kombatimentu di krimen di arma di kandela.

E resultado: sufisiente informashon pa por a inisiá tres investigashon penal di delito di arma di kandela riba korto plaso, dies produkto di informashon i un bista kada bes mas kla di e problemátika di arma di kandela den Karibe.

‘War Room 2.0’ a enfoká prinsipalmente riba análisis di e patronchinan ku por detektá den transporte, kompra i benta, posishon i uso di arma di kandela ora bo kompará e diferente islanan.

A usa fuente di informashon tantu lokal komo internashonal, kombinando i suplementando esakinan ku téknika di inteligensia ‘open source’ (OSINT) i software pa hasi análisis di dato.

E inisiativa pa organisá e edishon akí di War Room a bini di Kolegio di Hefenan di Polis. Organisashon di e evento tabata den man di Interinsulair Informatie Coördinatie Platform (IICP), den kolaborashon ku Nationale Politie di Hulanda. E enkuentro akí ta sigui e eksitoso evento piloto ku a tuma lugá na mart di 2025.

War Room 2.0 a konta ku partisipashon di personal di tur sinku kuerpo polisial den Reino, Recherchesamenwerkingsteam (RST), Koninklijke Marechaussee i Kustwacht Caribisch Gebied. Ministerio Públiko tambe tabata estrechamente enbolbí.

Minister di Hustisia di Aruba Arthur Dowers a habri e evento, huntu ku hefe di polis Ramon Arnhem di Cuerpo Policial Aruba, kende a hiba palabra na nòmber di Kolegio di Hefenan di Polis.

Minister Dowers a ekspresá su apresio pa e echo ku ta sigui padilanti ku e inisiativa akí i a mustra riba e importansia di kontinuidat. Segun Dowers: ‘Inisiá e tipo di proyektonan akí no semper ta fásil; logra sigui ku nan riba plaso largu, ménos ainda.’ E minister a bisa ku e ta sumamente interesá pa mira e produktonan ku lo Sali for di e edishon akí.

Djis su tras, e hefe di polis a enfatisá e importansia di kooperashon regional. El a bisa: ‘Pa nos ta un honor ku e di dos edishon akí ta tuma lugá na Aruba. Esaki ta no solamente un honor pa Cuerpo Policial Aruba, sino tambe un muestra di konfiansa den e kolaborashon ku nos komo isla a bini ta desaroyá ku nos islanan ruman i ku nos partnernan den e último añanan.’

Rafiek Dinmohamed, koordinadó di IICP, a reflekshoná riba desaroyo di e plataforma. ‘Na 2024, dia nos a start ku IICP, nos tabatin un vishon: e konvikshon ku kooperashon polisial entre e islanan – mihó bisá, entre e paisnan – mester por ta posibel. Entretantu, tiki tiki nos a krese te bira un tim dediká di inteligensia interinsular ku diariamente ta kolaborá, interkambiá informashon i generá produkto di informashon ku ta kontribuí na e lucha kontra kriminalidat den Reino.’

E kolaborashon akí ta tumando lugá presisamente na momento ku tin un krísis di arma di kandela den Karibe. Último añanan, tabatin un oumento bisto den poseshon i uso di arma di kandela. Den e siman di e War Room mes tabatin un delito grave relashoná ku arma di kandela, mustrando kon urgente e asuntu akí ta realmente.

E partisipantenan a inventarisá mesora ki informashon relevante por kompilá.

E análisisnan a revelá algun patronchi masha kla. Ta eksistí un relashon fuerte entre arma i droga. Tambe, a konfirmá eksistensia di e dinámika entre arma, droga i banda kriminal ku ta wòrdu señalá algun tempu kaba den nos region.

A konstatá ku tin diferente persona aktivo na vários pais di Reino i ku nan ta usa e mesun tipo di ruta‑, fasilitadó- i strukturanan logístiko. A identifiká indisio nobo, pero tambe informashon ku ta di interes direkto pa algun investigashon penal ku ta andando kaba.

War Room ta un bon ehèmpel di kolaborashon mas aya ku palabra bunita, kolaborashon transformá den echo konkreto.

Miéntras ku e promé edishon a wòrdu deskribí komo komienso di un etapa nobo di kooperashon den Reino, e di dos edishon akí ta mustra ku, entretantu, e manera di traha akí ya ta bon ankrá i dunando resultado. Pa otro aña, ta preparando un edishon mas.

Den e kuadro ei, ta trahando riba mas kolaborashon ku CARICOM IMPACS pa asina sigui amplia kooperashon na nivel regional.

FUENTE: KOLEGIO DI HEFENAN DI POLIS/LIVE99FM