AKI DOS SIMAN RIBA 29 DI ÒKTOBER NOS NA BONAIRE POR VOTA PA TWEEDE KAMER.

Kralendijk,- Kisas e pensamentu ta ku mi no tin nada di aber ku polítika di Hulanda, no lubidá ku Bonaire ta Entidat Públiko den Hulanda.

Hulanda ta responsabel pa Enseñansa, salubridat, hubentut, siguridat i siguridat sosial. Komo siudadano mi ta mira Adelanto riba e terenonan menshoná i a reflehá kua mandatario hulandes a duna aporte konkreto pa mehorá Enseñansa, salubridat, hubentut, siguridat i siguridat sosial na Bonaire.

Mi ta menshoná mandatarionan di Christen Unie (CU). Andre Rouvoet huntu ku Marga Drewes a pèrkurá pa Hubentut I Famia ku awe ta Akseso, Arie Slob riba tereno di enseñansa, Paul Blokhuis tokante hubentut I deporte, Maarten van Ooijen tokante salubridat, bienestar, deporte i Carola Schouten riba tereno di siguridat sosial.

Don Ceder ku a skucha abitantenan di Lagun. Mi sosten ta pa Christen Unie (CU)  Motibu pa nos vota ta pa kita posibel pensamentu ku no tin interes i ku ta sèn so nos ke di Hulanda.

Pa medio di voto nos ta demostrá ku nos ta lucha pa trato igual, derecho humano, protekshon kontra kambio di klima, kontra rasismo, diskriminashon i ku nos mester sinta na mesa i dialogá. No lubidá ku Pvda ke a manda independensia pa nos pa medio di pòst, Geert Wilders ke bende nos riba Marktplaats, manera tempu di sklabitut. Struktura Estatal, riba kua tin krítika funda, ta yu di CDA,VVD i D66. Nos ta liber pa skohe pero ku e tiki voto nos por manda un mensahe kla pa polítikonan hulandes.

Vota konsiente i no keda sin bai vota.

FUENTE: ARTHUR SEALY