Redakshon
Kralendijk,- Mientras hopi pais den e kontinente Amerikano ta komemora 10 di òktober komo Día di Columbus—un fecha ku ta simbolisa e “deskubrimento” Oropeo i e kuminsamentu di kolonisashon—e pueblonan Karibeño i Amerikano Indígena ta lamenta e dia aki komo un momentu di invashon, okupashon i genosidio.
E aña aki, 10 di òktober 2025, a marka 15 aña di e disolushon di Antia Hulandes na 10-10-10, un tragedia pa e pueblo antiano, ora ku Hulanda a huza e mesun fecha históriko pa imponé un forma renobá di rekolonisashon I dominashon kolonial, ku a aneksa Boneiru den e Konstitushon Hulandes bou di kontrol direkto di Den Haag.
Durante e seshon di formashon di e ultimo Parlamento di Antias Hulandes na 2010, kaminda ofisialnan di islanan antiano tabata presente, James Finies a pidi nan pa no laga Boneiru i e hermandat antiano abandona despues di e disolushon di Antias.
E a hasi un yamada ofisial pa preservá un organismo antiano pa kultura, deporte i otro forma di kolaborashon, pa mantene e union i identidad komun entre e islanan. Sinembargo, su petishon no a wordu tuma na konsiderashon.
Pa medio di manipulashon legislativo, e status autonomo anterior di Boneiru a wordu kambia, rebahá na un “entidat públiko,” e klasifikashon administrativo mas abou bou di lei hulandes. E reklasifikashon aki a pone Boneiru bou di hopi kapanan di gobernashon no-demokratiko for di Den Haag, eliminando demokrasia representativo i violando e standardnan internashonal i di Nashonan Uni pa propio-gobernashon i autodeterminashon.
A pesar di un referéndum na 2015 kaminda 66% di e pueblo di Boneiru a rechaza e status impone, Hulanda a ankra definitivamente e status impone aki den 2017—fortalesiendo asina un sistema moderno di dominasion kolonial kontinuo.
Un di e promé aktonan di e gobernashon nobo aki tabata e imposishon di leynan “inmoral”, ku tur lider i siudadano lokal a oponé kontra, pasobra nan tabata violá e balornan kultural i religioso di Boneiru. Den Haag a ignora e protestanan, I a intensifika e subordinashon politiko I falta di respet kultural.
Defensor di derecho humano James Finies a disidi di lidera un kampaña internashonal na Amerika Latina, Karibe, Oropa I na sede di Nashonan Uni, pa denunsia I eksponé e praktikanan I simbolismo kolonial Hulandes.
Den e proseso aki, Finies a deskubrí ku e Mishon Hulandes na Nashonan Uni tabata situa den e “edifisio numero 666 ” na 2nd Avenue, New York—un direkshon ku tin un signifikado simbóliko profundo pa e pueblo di Boneiru, ku den su gran mayoría ta kristian i ta asosiá e número di 666 ku maldat.
Pa hopi hende, esaki a bira un metáfora kla di e desbalanse moral i spiritual di kolonialismo. Despues ku e simbolismo aki a wordu eksponé publikamente via plataformanan sosial, e Mishon Hulandes na Nashonan Uni resientemente silensiosomente a kambia e number di e edifiso di 666 pa – 6 Grand Central Building—un kambio chikí, pero di gran sinifikado.
“E kambio aki ta mustra ku asta e simbolonan di kolonialismo por wordu enfrenta i transformá,” “Nos lucha ta demostrá ku denunsia I eksponé e inhustisia di tanto den práktika komo den simbolismo—por trese kambio real.”
Mientras Boneiru ta marka 15 añja desde e aneksashon di 10-10-10, kambio manera esaki di simbolismo, di e renombramentu di e edifisio di e Mishon Hulandes na Nashonan Uni, ta representá un testimonio di e forsa di sosiedat sivíl i e lucha internashonal kontra e praktikanan kolonial kontinu i nan simbolonan persistente.
FUENTE: JAMES FINIES
GIPHY App Key not set. Please check settings