KU YAGMENTU RIBA MIÓNES KU TA INDISPONIBEL KOLEGIO EHEKUTIVO TA HINKA BONEIRU DEN KAOS FINANSIERO

Kralendijk – Kolegio ehekutivo, pa medio di diputado Weber i inegabelmente dirigí pa diputado Abraham, ta hinkando Boneiru den un krísis profundo di mal gobernashon.

Den un intento inprudente pa kubri e garantianan finansiero pa WestJet, kolegio ehekutivo ta malinformá konseho insular i pueblo di Boneiru ku un mito finansiero peligroso. Den sentro di e malinformashon aki: un supuesto fondo di $6.6 mion ku ta den man di e kompania di gobièrnu BOG, ku, segun kolegio ehekutivo, por wòrdu kitá for di nan sin mas. Sinembargo, dokumentonan ofisial ta revelá un realidat spantoso di mantenshon atrasá, un falta di maneho, i kosnan flagrantemente inkorekto, ku ta hasi kualke intento pa un retiro rápido di kapital imposibel i ilegal.

E Mito di e Miónes Disponibel

Den un karta na Konseho Insular (number di kaso Z/25/031258), kolegio ehekutivo ta pretendé inkorektamente ku Bonaire Holding Maatschappij (BHM) tin outoridat i responsabilidat pa sostené finansieramente e kompanianan ku ta kai bou di dje pa medio di nan kuentanan anual konsolidá. E informashon inkorekto aki ta krea e impreshon ku e miónes na BOG ta disponibel mesora. E hechonan, basá riba e propio dokumentonan di OLB i e entidatnan enbolbí, sinemabargo ta devastador:

1. Kuentanan Anual Atrasá Ta Blòkia Tur Kos: E opstákulo mas fundamental ta ku e kuentanan anual konsolidá di BHM ta añanan atras.

(Kuentanan anual konsolidá di BHM ta nifiká ku BHM ta kombiná e sifranan finansiero di tur su supsidiarionan [BOG, SELIBON, Telbo, TCB, BonLab] den un solo kuenta, komo si fuera ta trata di un kompania).

Sin kuentanan anual aktualisá,  ouditá i aprobá pa e akshonista (OLB), un emishon di dividendo no por tuma lugá. E sugerensia di diputado Weber cu e fondonan aki lo ta disponibel a korto plaso ta un ilusion peligroso. Pa eleminá e atraso aki lo tuma lunanan, si no mas ku un aña. Pa ilustrá, kolegio ehekutivo ta lubidá ku, debí na su akshonnan, BHM, a retirá e kuentanan anual di 2023 di TCB ku ya a wòrdu aprobá na ougùstùs di e aña aki.

• Kolegio Ehekutivo Ta Atmití: No Tin maneho di dividendo: Den un karta na konseho insular tokante e kuentanan anual di BOG (number di kaso Z/24/019560-D076766), kolegio ehekutivo ta atmití literalmente ku OLB no tin un maneho di dividendo genériko. Kolegio ehekutivo mes ta rekonosé por eskrito ku falta e kondishon mas básiko pa un retiro di kapital legal. Tòg, e konseho insular ta wòrdu dirigí na kere ku miónes tei pa hasi uso di dje sin mas.

• BHM Ta Refuta Kompromiso: E kolegio ehekutivo ta afirmá firmemente ku BHM a komprometé su mes na pone kapital disponibel. Sinembargo, e palabra “kompromiso” ku na man a wòrdu heskrap i e palabra “intenshon” a wòrdu agregá pa loke ta trata e moshon aprobá pa konseho insular dia 7 di òktober 2025 (9Z/25/031276-D108733) ta revelá ku esaki ta un informashon inkorekto. BHM nunka por a hasi un kompromiso asina sin un desishon legalmente bálido di su mes akshonista (OLB) i aprobashon di su hunta di supervishon. E afirmashon di kolegio ehekutivo ta un malinformashon serio di Konseho Insular.

Maneho Imprudente i Deskonsiderashon pa Proseduranan

E akshonnan di kolegio ehekutivo ta un ehèmpel klave di maneho imprudente. En bes di inkorporá strukturalmente e garantia di WestJet den e presupuesto, manera akordá, e kolegio ehekutivo awor ta kreando un kòrtina di huma. Nan ta ignorá nan propio proseduranan i e kuadronan legal di gobernashon korporativo den un intento desesperá pa sera un buraku finansiero. Esaki no ta un maneho sano; e ta un aventurismo finansiero ku ta pone stabilidat di nos kompanianan di gobièrnu i fondonan públiko na peliger.

Konseho insular mester intervení awor.

Konseho Insular, komo e órgano di mas haltu riba nos isla, no por tolerá mas e deskonsiderashon aki pa ku bèrdat i lei. Ta tempu pa ehersé su ròl di supervishon ku vigor. Nos ta urgi konseho insular pa intervení mesora i demandá di konseho ehekutivo pa:

1. Para tur kos di inmediato: Stòp ku e yagmentu iresponsabel aki riba rekursonan legalmente indisponibel i koregí e informashon inkorekto suministrá na konseho insular.
2. Pone Prioridat pa kosnan na Òrdu: Obligá kolegio ehekutivo pa na promé lugá eliminá e atraso di añanan largu den e kuentanan anual (konsolidá) di BHM i pa establesé un maneho di dividendo sólido aprobá pa konseho insular.
3. I inisiá un investigashon riba Mal Maneho: Lansa un investigashon profundo riba e akshonnan di kolegio ehekutivo pa loke ta e malinformashon deliberá di konseho insular.

Ta tempo pa transparensia, íntegridat, i rèspèt pa lei. E Salú finansiero di Boneiru ta den peliger.

FUENTE: DR. WILLEM A. CECILIA