PBNO: RUTA REALÍSTIKO I SIGUR PA OUTONOMIA BONEIRU

Kralendijk,- Plataforma Boneiru Nobo i Mas Outónomo (PBNO) ta enfatisá ku den e situashon geopolítiko aktual, solamente un ruta realístiko, den fase, i demokrátikamente legitimá lo ofresé Boneiru un kaminda sigur pa outonomia.

No pasonan radikal, skòpmentu kontra Hulanda òf salimentu for di Reino, pero un akumulamentu sólido di kompetensia atministrativo, konfiansa i legitimashon internashonal.

Durante e reunion di IPKO na Den Haag, historiado Gert Oostindie a argumentá ku e islanan mester pone nan mesún kas na òrdu ku un gobernashon fuerte i íntegro, sostené pa Hulanda unda ta nesesario.

PBNO ta pará tras di esaki i ta konektá esaki na su balornan sentral: Bèrdat,  Igualdat, i Inklusivitat (inklusividat). Segun PBNO, e petishon resién pa sostén di kolegio ehekutivo i konseho insular serka e islanan Kòrsou, Aruba i St. Maarten, ta demostrá primordialmente dependensia i reakshonnan ad-hoc riba desishonnan hulandes, manera esun pa mantenshon di e funshon di Representante di Reino.

Na lugá di esei, PBNO ta boga pa un akuerdo di koperashon struktural entre tur e seis islanan pa kolaborá sistemátikamente den áreanan manera ekonomia, edukashon, klima, i gobernashon, pa aktua konhuntamente pa ku Hulanda, i pa desaroyá un agènda karibense kordiná. Di e manera aki, seis bos separá ta bira un partner fuerte i proaktivo. E Akuerdo di Papiamentu ta prueba ku e modelo aki ta realisabel i por wòrdu ekstendé na tur área di maneho.

Na mes momento, PBNO ta spera ku Hulanda tuma responsabilidat y fortifiká konfiansa dor di no tuma desishonnan unilateral, pero sèmper konsultá e islanan di antemano. Un ehèmpel positivo tabata e periodo 2019–2023, ora ku, pa medio di konsulta i komishonnan di stür konhuntu, a aprobá kuentanan anual pa promé biaha, a inisiá un proseso di bon gobernashon, i a prepará abolishon di e posishon di Representante di Reino.

E eksperensia di e direktor di Fundashon Cas Boneriano sr. Ben Oleana, ku e Lei di Bibienda BES ta demostrá ku kolaborashon pragmátiko por duna benefisionan konkreto, miéntras ku e sientífiko polítiko Kristensen a enfatisá ku institushonnan fuerte, kòntròl i balansa, i partisipashon aktivo di siudadanonan, ta esensial pa un demokrasia saludabel. Esaki ta konfirmá e kurso di PBNO.

P’esei e plan di dies aña 2025–2035 ta pèrkurá pa sinku fase: for di mobilisashon interno i konstrukshon di kapasidat te na un referèndem di outodeterminashon opservá internashonalmente na 2035. E promé prioridat ta pa demostrá ekselensia atministrativo i protekshon sosial, di manera ku Boneiru por reklamá mas responsabilidat konvinsentemente.

PBNO ta hasi un yamada na tur aktor polítiko i sosial pa djòin e kombersashon. No oposishon radikal, pero koperashon—lokalmente, regionalmente, i ku Hulanda—ku ta ofresé Boneiru e mihó i un kaminda mas sigur pa un futuro ku mas outonomia i igualdat.

FUENTE: DI PBNO, WILLEM A. CECILIA