KRISIS DEN GOBERNASHON: NA VARIOS OKASHON FRENTE SOSIAL PROGRESIVO (FSP) A TRESE DILANTI KU E KOALISHON AKTUAL TA MANERA UN BARKU SIN RUMBO.

Kralendijk,- E kompas ku ta un programa di Gobernashon simplemente NO tei, pa 2 aña largu a papia hopi, priminti, pero sin muchu resultado positivo.

Sektor di konstrukshon a bati alarma, Bonhata ta na gritu i piskadonan ta malkontentu. Esaki nan ta e grupo nan ku a grita na bos haltu. Pero mayoria gruponan I siudadanonan ta malkontentu na un manera silensioso. Bo ta tendé ora bo topa nan na kalke entiero, den supermerkado, na misa, na laman, na nan kasnan I einan ta ekspresa nan malkontentu, nan preokupashon, nan asombrio, nan tristeza I natural nan fadansia grandi ku gobernashon.

Kisas miembronan di Kolegio Ehekutivo i Konseho Insular no ta nota esaki? Loke ku nos ta mira ta ku nan ta konstantemente den avion pa diferente rumbo, I mará na esaki  gastunan kuantioso ta bai na pago di hotel i restorant.  E dushi bida aki ta pone ku no tin atenshon ni enfoke riba nan responsabilidat gubernamental. Poko poko problemanan ta sigui krese I

ta bira un pustema. Na nos manera di mira, ata un rabu di krisis aki, ata e pustema. Pasó lo tin mas!

FSP a tuma nota ku den fin di siman Diputadonan Cicilia i Den Heyer a tuma retiro. Pushi pushi riba un dia liber ke bira lomba for di e funkshon importante aki i asina laga e komunidat Boneriano den insiguridat. Sin duna splikashon, manera ku ta trata un trabou privá.

Ta den bo bida personal bo ta tuma un trabou of bandona un funskhon sin splika niun hende. Pero no den un puesto gubernamental. Ta falta di respet I ta falta di konosimentu di gobernashon. Ta opvio ku den komunidat ta kuminsa ku spekulashon. Despues ku hopi siudadano a ekspresa nan malkontentu den medionan sosial, nos a ripará ku a sluip saka nan karta den kua a pidi nan retiro. Den e karta aki ta menshoná ku ta KOALISHON A PIDI NAN PA RETIRA pasó koalishon no ke  sigui goberná mas ku e asina jamá ‘vak gedeputeerde’.

Nos ta nota ku partidonan di koalishon ta saka un komunikado i bisa ku no tin ningun problema den koalishon ni ku Gobernashon. Den un karta na Konseho Insular sr Gezagheber Soliano  ta informá ku e a intervení i KITA OUTORIDAT KOMPLETU for di tur 3 Diputado.

I ku awor ta GEZAGHEBER so ta BESTUURSCOLLEGE. E ta asta urgi Konseho Insular pa asumi nan responsabilidat i nombra Diputado nobo mas lihé posibel. Nos ke pidi nos komunidat pa sinta regt I vigilá paso ta un krisis grandi tin ora ku Gezagheber tuma over. No laga ningun fanatiko tira santu den bo wowo. 

Nos a tuma nota tambe ku Diputado mayó esta sr. Clark Abraham ku ta fuente di hopi pero hopi problema den Gobernashon  mes a keda duru sintá den su stul anke sin outoridat.

Sr Abraham a kaba regresá for di Hulanda despues di ta mas di un luna den eksterior gosando di plaka di pueblo, sr Abraham ta mete den kartera di tur otro kolega Diputadonan i asta ta mishi ku resposabilidatnan di Gezagheber.

Nos ta kere ku e gruponan ku a sali na gritu, pero tambe e mayoria silensioso sa di e barkunan mal pegá dor di e mandatario diputado Abraham pero tambe di su aktitut arogante I engañoso. Departamentunan di gobiernu Hulandes no ke ni sinta mas kune na mesa, negoshantenan ta sinti malestar ora ku nan kaba Sali di reunion ku e diputado aki, amtenarnan ta fada di e kultura di miedu den e aparato I dor di esei ta paralisa trabounan. Gobiernu ta den krisis!.

Anke tin hopi plaka den kaha di Gobiernu tòg e pueblo no ta mira e resultado deseá.

Un ehempel ta e supsidio riba koriente, esaki ta un proyekto finansiá pa Hulanda.Diputado Abraham riba su so ta kohe e fondonan aki i pone esaki den e presupuesto general di moda ku e sen aki te ku awe no por a wordu usá.

Net awo ku koriente a subi ta laga esnan den mas nesesidat na kaya.

Te awe fondonan pa ku e proyekto di transporte pùbliko ta warda riba Diputado mayó su bendishon pa por ranka sali ,mientrastantu nos pueblo ta sklama pa alivio.

Asina tin hopi ehempel mas kon e Diputado mayó aki ta brua tur kos den Gobernashon.

Pero tog net e mandatario aki no ta wordu bahá for di e puesto di Diputado.

Esaki ta nifika ku lo kambia 2 diputado pero e wega di pleita, diskutí, brua kos, hunga sabí,falta respet, mete den portafolio di koleganan i stanka Gobernashon, lo kontinua.

Gezagheber Soliano a pasa Konseho Insular un wanta i lanta esaki for di soño. Ban spera ku porfin nan lo spièrta i jama un reunion publiko di Eilandsraad.

FUENTE: ROBBY BEUKENBOOM LIDER POLITIKO FSP