TA DI APLOUDÍ KU SINDIKALISMO TA REALISÁ I TA KONSIENTE KU BANDA DI E KRESEMENTU DI E KONSENSHI DI E KLASE TRAHADÓ KU SU FORSA TA SINTÁ DEN UNION.

Kralendijk,- komo e grupo mas grandi den kualkier komunidat ku ta karga e desaroyo ku su labor e mester kontinuamente risibí informashon i formashon pa garantisá ku su bos lo keda semper respetá i rekonosé.

Tambe ta bon pa prepará lidernan nobo ku lo por tuma over i garantisá kontinuidat riba nivel di sindikalismo den nos komunidat. Preparashon no ta nada otro sino duna informashon i formashon den un forma kontinuo.

Por a tuma nota ku den e simannan tras di lomba trahadónan/miembro di sindikatonan afiliá na USIBO por a partisipá na dos kurso. Un kurso ku a trata temanan manera importansia di lèi laboral pa shopstewards, kontrato laboral, CAO i lei, derechonan i obligashonnan di un dunadó di trabòu i di un trahadó.

No ménos ku 34 trahadó a sigui e kurso aki i opviamente a sali ku mas konosementu ku lo ta un sosten pa nan den nan trabou komo shòpsteward riba flur di trabou.

Djasabra último sindikatonan afiliá na USIBO a krea e posibilidat pa nan miembronan por a bin tuma informashon tokante funshonamentu di Diálogo Sentral i e ròl importante ku USIBO komo bos di trahadó ta hunga den e plataforma tri-partit aki. E partisipashon tabata rasonabel, pero a sinti falta di mas partisipashon di e sindikato di polis NAPB-BES.

E sindikato di maestronan SIMABO a diskulpá pa ousensia di sigur 10 miembro, pero lo krea otro oportunidat pa esakinan tambe risibí informashon.

Aki tambe e partisipantenan a sali ku mas konosemenu kon henter nos komunidat ta funshoná riba temanan manera ekonomia, belasten pero tambe leinan sosial i leinan laboral ku mester t’ei pa tin e balansa pa un desaroyo duradero. Aki tambe por a mira ku un kantidat di e partispantenan a duna di konosé di kier sa mas i ku nan lo ta dispuesto di remplasá esnan ku aktualmente ta representá USIBO den e plataforma tri-partit.

E situashon na medio-oriente kombiná ku e guera ku ketu bai tin entre Rusia i Ukraina ta dunando señal ku mundu ta yegando na un punto sumamente peligroso i esei ta e riesgo serio di un di tres guera mundial ku tur su konsekuensianan ku esaki tin.

Nos na Boneiru ta físikamente leu for di e zona di e gueranan aki, pero no ta ekskluí ku sea direkto o indirekto nos lo por bai sufri konsekuensianan di esaki.

Nos ta konsiente ku nos eksistensia aki na Boneiru pa 90% ta dependé di afó. Primeramente nos ta dependé pa 50% di nos entradanan i nos forsa laboral di turismo di kual un gran parti ta prosedente di Merka. Ku Merka envolví den guera nos mester ta prepará ku biahamentu di e merikano pafó di su pais lo por bai baha konsiderablemente.

Fuera di turismo ku ta e fuente di trabou mas grandi riba nos isla, pa tur sobrá kosnan ku nos mester nos ta dependé di importashon. No ta asuntu ku nos bida lo bira mas karu, sino ta kuestion ku e bida ta mas karu kaba i mas karu so e por bira.

Por sierto ya nos tur ta sinti e oumento di nos gastunan di kumindá, di hür di kas, di biahamentu, di koriente awa gasolin, ets. ets. Pues e sentido di aktua ku urgensia t’ei. No tin espasio pa sigui traha plan, traha maneho riba papel, pero mester aktua ku urgensia i ku un aserkamentu práktiko di e problemanan ku nos ta konfrontá i ku nos mes por solushoná.

Un di nan ta seguridat di kuminda. Sindikalismo kier hasi un yamada na nos gobernashon lokal, pero mas fuerte ainda un yamada na nos Konseho Insular, komo esnan legalmente eskohé pa pueblo pa deklará seguridat di kuminda prioridat number 1 Mester yama un konferensha nashonal ekonómiko pa atendé ku tur faktor i aspekto ku ta di influensha riba seguridat di kuminda pa nos pueblo.

Produkshon di propio kuminda no ta tolerá mas posponementu, kreashon di e infrastruktura nesesario poniendo fondonan supstanshal disponibel mester konkretisá den e di dos parti di e aña aki. I pa loke ta merkado laboral, sindikalismo mester ta alerta i prepará nan mes pa posibel konsekuensianan ku e krisis ekonómiko na kaminda lo por tin pa e klase trahadó i su famia.

No dèmpel e pos ora e baka hoga, pone protekshon rondó di e pos pa e baka no kana kai aden. Un hòmber atvertí ta konta pa dos.

Mi tin sigur ku e aporte di sindikalismo den e menasa di krisis ekonómiko aki ta mes balioso komo ora sindikalismo ta boga pa ta parti di e bolo ora tin abundansia.

FUENTE: NÒCHI WILLEM/LIVE99FM