ARUBA: MEP TA EXIGI SOLUCION PA IMPUESTO RIBA VACATION RENTALS: “CADA SECTOR MESTER CONTRIBUI NA UN ARUBA MAS FUERTE”

Oranjestad – Fraccion MEP a dirigi pregunta na e Minister di Finansas despues cu durante e reunion di Parlamento cu Aruba Tourism Authority (ATA) riba 2 di oktober, e director a indica cu ultimamente no tabatin mas consulta tocante vacation rentals y cu actualmente no tin un solucion concreto riba mesa pa cobra impuesto di e sector aki.

MEP ta considera preocupante cu, mientras vacation rentals ta forma un parti grandi di nos oferta turistico, ainda no tin claridad tocante con e sector aki ta contribui na e entrada di Gobierno. “Desde tempo di nos gobierno, nos a traha riba solucion pa e problema aki.  Lamentablemente gobierno a cay y nos no por a keda cla cu soluciona e problema aki. Mi ta lamenta cu e gobierno di AVP/Futuro no a continua pa traha riba e solucion, y mientras tanto tempo valioso a pasa, y e problema a bira hopi mas grandi”, segun lider di fraccion di MEP Evelyn Wever-Croes.

Un economia fuerte ta exigi regla cla y contribucion husto. Empresanan y ciudadanonan cu si ta cumpli cu nan obligacionnan fiscal no mester keda carga cu un peso desproporcional, mientras otro parti di e economia no ta contribui na e mesun manera.

MEP a pidi e Minister pa duna claridad tocante e esfuersonan cu a tuma luga, e entrada di impuesto actual, e posibel perdida di entrada fiscal y e medidanan concreto pa logra un sistema di cobramento efectivo y transparente di belasting y sumanan pa permiso.

MEP ta enfatisa cu e meta no ta pa pone obstaculo na haci negoshi, ni na turismo, sino pa crea un sistema fiscal husto, transparente y sostenibel, caminda tur sector ta contribui na e desaroyo di Aruba.

E entrada fiscal ta esencial pa Gobierno por inverti den infrastructura, servicio publico y calidad di bida di nos pueblo.

MEP lo sigui insisti riba solucion concreto, cooperacion entre e instancianan relevante y un sistema husto pa tur hende. Aruba su prosperidad mester beneficia nos comunidad henter, y esey ta cuminsa cu responsabilidad comparti.

FUENTE: PARTIDO MEP ARUBA/LIVE99FM