Redakshon
Kralendijk – Tourism Corporation Bonaire (TCB) na luna di yüli a duna rekonosementu na ocho bishitante komo embahador di Boneiru. Esaki den kategoria di bròns, oro i platino.
Famia Wulff Stenersen konsistiendo di Ingrid, Christian, Nicolai i Thomas, prosedente di Noruega ta bishitando Boneiru pa 12 aña. Nicolai i Thomas tabata beibi ainda tempu ku nan a bishitá Boneiru pa promé biaha.
Chuck Shultis di Merka tambe a risibí su rekonosementu. E tambe ta bishitando Boneiru pa 12 aña. Tantu famia Wulff Stenersen i Chuck Shultis ta enkantá ku e mundu marino di Boneiru. Nan a risibi nan sertifikado i nan feneta di bròns.
Michael Graaf, tambe di Merka, a keda honrá pa ta bishitando Boneiru 20 aña. “Boneiru ta laga bo sinti ku bo ta na kas, aunke bo ta leu for di kas. Mi a enamorá di e isla akí i su habitantenan amabel for di e promé biaha ku mi a bishitá Boneiru,” asina Michael a deklará. Michael a risibí su sertifikado i su feneta di oro.
Den kategoria di platino, a rekonosé Liz McGinnis i Serena Ogburn. Liz ta bishitando Boneiru pa 44 aña i Serena pa 45 aña. Nan ta bishitá Boneiru 3 bes pa aña. Segun Serena Ogburn: “E mundu marino ta bunita, temperatura di laman ta bon, e hendenan ku bo ta topa kuné na Boneiru ta amabel i e isla tin hopi pa ofresé”. Liz McGinnis a konkluí ku: “E buelonan internashonal regular ku tin awor akí pa Boneiru, ta hasi e isla akí mas aksesibel for di Merka. Mi a mira e isla aki desaroyá for di tempu ku mi tabata mucha, e hendenan ta amabel i e gastronomia di e isla ta fantastiko.”
Pa TCB Helen Mercera a hasi entrega di e sertifikadonan, fenetanan i obsekionan korespondiente.
FUENTE: TCB/LIVE99FM
GIPHY App Key not set. Please check settings