DIPUTADO TIMOTEO SILBERIE TA FELISITÁ TUR PENSHONADO RIBA DIA DI PENSHONADO

​Kralendijk – Na okashon di Dia di Penshonado, diputado Timoteo Silberie ta mustra su apresio i gratitud na tur penshonado na Boneiru.

​E dia di awe nos ta para ku respèt i gratitut pa e hendenan ku durante hopi aña a entregá nan mes ku kurason i dedikashon pa nos komunidat. Ku boso esfuerso, konosementu i eksperensia di bida, boso a kontribuí na konstrukshon di e Boneiru ku nos ta konosé i apresiá awe.

Pa esaki nos ta hopi agradesido na kada unu di boso.

​Dia di Penshonado no solamente ta un momento speshal pa mira bèk, sino tambe pa selebrá e konekshon duradero ku nos hende mayornan. Penshonadonan ta un parti importante i indispensabel di nos komunidat. Hopi di nan ta aktivo ainda komo boluntario, mantelzorg, miembro di famia, bisiña i konsehero sabí.

​Nos penshonadonan ta fuente di kalor, sabiduria i konekshon. Nan ròl den nos komunidat no ta stòp na momento ku nan bai ku penshun; nan ta keda importante pa fortifiká famia, bario i nos komunidat kompleto.

​Komo diputado nos ta enfatisá e importansia di un komunidat kaminda hende mayor ta sinti nan balorá, respetá i inkluí, i kaminda nan por sigui partisipá na un manera ku ta konvení nan. Bon kuido, sosten i konekshon sosial ta keda esensial den esaki.

​Na nòmber di Entidat Públiko Boneiru, diputado Timoteo Silberie ta mustra su apresio i ta deseá tur penshonado un Dia di Penshonado yen di amor i selebrashon.

​Nos ta agradesido na boso pa tur loke boso a nifiká pa Boneiru i ta sigui nifiká ainda. Boso ta i lo keda un pilar balioso i kerí di nos komunidat, awe i den futuro.

FUENTE: OLB/LIVE99FM