UN SOÑO BONERIANO TA BIRA REALIDAT

Kralendijk,- For di chikí, Terrence Anthony tabatin un gran s0ño: bira un chef kok di nivel haltu. Awe e a yega un otro paso grandi den e dirección aki, despues ku ela risibi un rekonosemento especial for di un di e mihó skolnan culinario aja na Hulanda, ROC van Twente, pa su perseverancia, dedikashon i resilensia.

E kaminda di Terrence no tabata fasil.

Despues di finalisá su estudio MBO Nivel 2 di kushina na Boneiru, ela topa ku un gran reto. Na e tempu ey no tabatin posibilidad pa sigui ku MBO Nivel 3 na Boneiru, asina ku e mester bai Hulanda pa  asina sigui ku su studio.

Ku hopi determinashon, Terrence a prepará pa sigui su estudio, pero e pandemia di COVID a kambia tur kos. Su entrada na skol a wordo posponé i e mester a warda te ora e scolnan por habri atrobe.

Durante e periodo ey, cu no tabatin mas posibilidad di estudio na Boneiru, ela bai traha mientras ku e tabata sperando pa un oportunidad nobo.

E oportunidad ey a yega na The Hang Out Beachbar na Sorobon, unda ela traha hunto ku su tio Charlton Soliano i bou di guia di chef renomá Dave, doño di The Hang Out Restaurant.

Chef Dave a mira e talento extraordinario cu Terrence tabatin i a sigui stimul’é pa sigui krese. Sin ku Terrence sa, un dia Dave a dune oportunidad pa prepara kuminda pa e konosído Jonnie Boer i su kasa Thérèse Boer.

E momento ey a kambia su bida.

Impresioná pa su talento i pashon, e famia Boer a ofresé Terrence un oportunidad úniko pa asina bai Hulanda, sigui su estudio i traha na e restaurant die tres streana Zwolle kual ta De Librije.

Awe nos ta mira e fruta di tur su trabou duro, dedikashon i persistensia.

ROC van Twente a honra Terrence awe ku un reconocemento especial pa su perseverancia i resilensia. E fayesimentu di Jonnie Boer a toka no solamente mundo culinario, sino tambe Terrence personalmente. E tabata un persona ku a kere den Terrence firmamente, i su fayesimentu kasi a hasi Terrence perde kurashi.

Pero, pa honra su memoria, Terrence a sigui loke el a primintí: sigui traha duro, sigui siña i sigui persigui su soño.

Awe e ta kumpliendo ku su palabra.

Boneiru por sinti orguyo di un hoben ku lo representá nos isla den e mundo culinario.

Nos ta felicitá Terrence Anthony, henter e famia di De Librije, i su mayor Theresa Winkel i Remsley Anthony.

Boneiru ta hopi orguyoso di bo.