UPB TA BOGA PA MEDIDA INMEDIATO: PASASHI PAGABEL PA STUDIANTENAN BONERIANO BIN KAS REGULARMENTE

Kralendijk,Unión Patriótico Boneriano (UPB) ta hasi un yamada pa akshon inmediato pa hasi pasashi pa studiantenan boneriano den exterior mas pagabel i aksesibel. Líder polítiko Jolinda Craane ta boga pa un medida konkreto ku ta duna studiante oportunidat pa regresá na nan kas, Boneiru, algun biaha pa aña, sin ku e kostonan haltu di biahe bira un barera pa nan of pa nan famia.

“Nos studiantenan ku ta studia den exterior ta karga futuro di Boneiru ku nan. Pero hopi biaha, despues ku nan subi avion, nos ta laga nan muchu desampara,” segun Craane. “E distansia i e kostonan pa bin kas regularmente ta simplemente demasiado haltu pa hopi famia. Esaki mester i por ta diferente.”

Segun Craane, e benefisionan di bishitá Boneiru regular ta evidente. Investigashon i eksperensia den práktika ta mustra ku studiante ku tin e posibilidat pa regresá regularmente den nan ambiente konosí, ta logra prestá mihó den nan estudio. E kontakto ku famia, amigunan i nan propio kultura ta duna sosten na bienestar i motivashon di studiantenan ku, hopi biaha pa promé biaha, ta biba leu for di kas.

Ademas, Craane ta enfatisá e importansia di e medida aki pa futuro di e isla mes: “Ora ku studiante mantené e konekshon ku Boneiru, e posibilidat ta muchu mas grandi ku nan lo regresa despues di nan estudio pa pone nan konosementu i talento na servisio di nos isla. Di e forma aki nos ta evitá “brain drain” i nos ta invertí den nos propio komunidat. Esaki ta un invershon ku ta paga su mes bèk ampliamente.”

Craane ta indiká ku UPB no ta bin solamente ku un yamada, sino tambe ku un idea amplio di kon un medida asina por wòrdu implementá, kon e por wòrdu finansia i kon e ehekushon por wòrdu organisá na un manera efektivo den práktika.

“Nos tin e plan kla. Awor e pregunta no ta mas si esaki por, sino si tin e boluntat polítiko pa realmente hasi’é,” Craane ta deklará.

Craane ta hasi un yamada na e órganonan di gobièrnu envolví pa no keda pegá mas den deliberashon sin resultado. “Ya pa hopi aña ta papia riba e tema aki, kontinuamente, sin yega na un kambio struktural pa nos studiantenan. E tempu ei a pasa. Nos hóbennan meresé klaridat i akshon awor, no un otro ròndu di kombersashon. Ta tempu pa tuma desishon i ehekutá na interes di kada studiante boneriano ku aktualmente ta studia leu for di kas.”

UPB ta insistí pa pone e tema aki ku urgensia riba agenda polítiko, pa asina por yega na un desishon konkreto den termino kòrtiku.

FUENTE: UPB/LIVE99FM