USIBO A KONMEMORÁ SU DJES AÑA DI EKSISTENSIA

HEI , ABO TRAHADÓ, BO KONOSÉ BO DERECHO ?

Kralendijk,- Djabièrnè último 5 di yüni, USIBO a konmemorá su djes aña di eksistensia den presensia di tur esnan ku tabata t’ei for di inisio di e UNION SINDIKAL aki pero tambe representantenan den Diálogo Sentral.

Tabata reina un tremendo ambiente i un konsiensia grandi di tur hende ku a hiba palabra espontaneamente di e balor grandi di UNION SINDIKAL atraves di añanan ku a pasa komo un representante digno di trahadónan i nan famia igual na mesa huntu ku gobièrnu i dunadónan di trabou, kámara di komersio i ministerio di asuntunan sosial i di labor.

Esnan ku a hiba palabra tabata Chaly Anthony e promé presidente di USIBO, Angelo Vrolijk, e vise-presidente aktual di USIBO i diputado Jennifer MohamedJoenoes su di finansas i ekonomia ku alabes a representá su kolega Timoteo Silberie i asuntunan sosial i di labor, presidente di Kámara di Komersio i empresanan, Jeaniro Balentien i tambe nos gezaghèber John Soliano.

E atardi/anochi a ser guiá den un foma profeshonal pa Jefferson Rosaria, miéntras ku Nòchi Willem a kana ku e presentenan pa medio di un slideshow den e historia di USIBO for di 2012 te ku awe bou di e kuater presidentenan, respektivamente Chaly Anthony, Chaly Mercelina, Mavis Abrahams i Cherel Kwidama, ilustrando e logronan di USIBO pa komunidat Boneriano, pero tambe ilustrando akshonnan konkreto ku USIBO a realisá pa por a logra koperá i partisipá na konstrukshon di un Boneiru nobo ku e meta pa yega na hustisia sosial.

Loke a resaltá den tur e spichan tabata e apresio, rèspèt i rekonosimentu ku USIBO i su dirigentenan a risibí.

Diessinku aña pasá lo tabata inposibel ku na un evento sindikal representantenan di dunadónan di trabou tambe ta presente i hiba palabra; esei tabata e mensahe klave ku presidente di Kámara di Komersio, Jeaniro Balentien a ekspresá.

Muska bo ta kue ku miel i no ku binager, USIBO a hasi un trabou fantástiko ku awe empresanan ta risibí sindikalismo ku konfiansa i no ku ménospresio.

Un kresementu den 5 pa 6 aña di 3 empresa organisá den un sindikato pa mas ku 25 empresa awe ta prueba palpabel di e trabou fantástiko ku USIBO a bin ta hasi durante e dies añanan. Esaki tabata palabranan di Mervyn Stegers, vise-presidente di Diálogo Sentral.

Un bon fundeshi pa sigui konstruí i sigui krese. Na un aniversario i sigur djes aña di kumpleaños a pone ku Gobièrnu di Boneiru tin un regalito pa USIBO ku den kurso di otro siman lo bira konosí, asina di diputado Jennifer MohamedJoenoes a ekspresá.

Union no mester ta na palabra so, pero mester ta den akshon konkreto. Awe mi ta rekordá manera tabata na 2012/2013 ora tabata reina e UNION sindikal i ku huntu a akseptá e invitashon di diputado Silvana pa bai traha huntu pa lanta e plataforma ku awe ta Diálogo Sentral i tur hende por a mira lesa e frutanan di e UNION aki.

Palabranan di profundo di su kurason tresé pa Chaly Anthony, e promé presidente di USIBO di 2012 te ku 2016.

“ Mi ta bolbe referí na e eksperensha ku mi pasa aden 1 di mei riba Dia di Labor i rekonosiendo e balor agregá di UNION i mirando e tempunan krusial pa Boneiru den su desaroyo ta hasi e UNION aki mas deseabel ku nunka, mi ta ekstendé mi man pa invitá tur organisashon sindikal, tantu esnan den USIBO komo esnan ku aktualmente no ta den USIBO pa bin huntu i reanudá, re-aktivá i renobá e intenshon ku djes aña pasá a forma e komienso di UNION SINDIKAL BONERIANO, USIBO. Ku tin diferensha ta sano, pero e meta semper mester prevalesé.

I HUNTU semper nos lo logra muchu mas ku kada un riba su mes”. Esaki tabata palabranan di John Soleano, nos gezahèber di Boneiru. Pues pronto por spera e invitashon di gezaghèber pa e enkuentro aki. Pues djabièrnè a sera un periodo di djes aña USIBO ku a kuminsá ku 7 sindikato i ku awe tin sigur 4 sindikato ku no ta forma parti di USIBO.

Un periodo ku a demonstrá e derecho di eksistensia di USIBO den komunidat Boneriano. I ohalá ku e man ku gezaghèber ta saka lo resultá ku e próksimo djes aña tur sindikato di Boneiru lo ta uní den un organisashon pa nos yuda konstruí un Boneiru fuerte riba e fundeshi di un desaroyo sosial-ekonómiko sostenibel i duradero i kaminda e bos di e klase trahadó t’ei komo partner igual na mesa.

I laga e siguiente mensahe ta e kòmpas tantu pa e lidernan sindikal komo sigur nan miembronan; ” Esnan mas Fuerte lo yuda esnan mas débil” i asina huntu nos ta konstrui un Boneiru ku un futuro briante pa nos, pa nos yunan i e próksimo generashonan un fundeshi fuerte pa sigui krese.

FUENTE: NORWIN NÒCHI WILLEM, KONSEHERO USIBO