SINDIKALISMO DOR DI TRAHADÓ, DI TRAHADÓ I PA TRAHADÓ.

Kralendijk,- Esaki ta e manera mas simpel pa deskribí e prinsipio sindikal pa tur hende por komprondé.

1 di mei último lamentablemente liderato sindikal na Boneiru no a logra pa selebrá i konmemorá Dia di Labor di tur trahadó na Boneiru konhuntamente. A bolbe skohe pa selebrashon  den un forma di divishon usando motibu i argumento ku ta demonstrá un falta grandi di karga responsabilidat di liderato den un forma madurá.

Despues di 1 di mei 2025 ku e sindikatonan a konmemorá e dia di 1 di mei huntu no a logra 8 sindikato ku kada un minimal 5 miembro den direktiva, ku shopstewardnan pa durante 364 dia largu pa bin huntu un dia i palabrá konmemorashon huntu  di 1 di mei 2026. Un selebrashon ku tin un patronchi fásil i tradishonal, esta apertura seremonial i despues aktividat i sosialisashon di tur trahadó ku presentá.

Gezaghèber John Soliano den su reakshon riba invitashon di 3 sindikato, esta AFBW, ABVO i FEDEBON a mustra klaramente riba e falta di unidat aki i a skibi:

Apresiabel direktiva di FedeBon, ABVO i AFBW,

Mi a risibí di boso tur un invitashon pa selebrashon di Dia di Labor riba 1 di mei próksimo. Lamentablemente, mi a konstatá ku aki ta trata di dos aktividat separá, unda mi ta invitá komo gezaghebber pa papia na tur dos aktividat na mes momento.

“ Lo bo por imaginá ku e situashon aki ta pone ami komo gezaghebber, den un posishon inkómodo i imposibel. Mi no ke tampoko pa mi wòrdu pone den un posishon ku mi mester skohe kua aktividat mi ta asistí i kua nò. Lo mi kompartí mi mensahe tokante Dia di Labor ku boso tur i mi no lo por asisti fisikamente na tur dos aktividat. Na mes momento, mi ke hasi un yamada na boso organisashonnan respektivo pa hasi loke ta nesesario pa yega na un selebrashon konhunto riba Dia di Labor, algu ku lo benefisiá e moveshon sindikal en general ” .

Pa tòg manda un mensahe pa e klase trahadó gezaghèber a manda un mensahe ku ta bisa:

“ Labor ta un parti esensial di nos bida i e ta hasi posibel ku nos por prove’é den nos mantenementu di tur dia, pero tambe ku nos por desaroyá nos mes komo persona. Lamentablemente, nos mester rekonosé ku protekshon di e empleado, tantu lokalmente komo internashonalmente, ta un reto ku ta sigui eksistí. Lokalmente, nos ta trahando duru pa mehorá kòntròl, pa un par dunadó di trabou di “mala fe” no por kita òf marginá e derechonan di e empleado. Ta hopi importante i nesesario pa invertí den e empleadonan pa hasi nan aun mas fuerte i resiliente. Konosé bo derechonan!

E merkado laboral di awe ta pidi fleksibilidat i desaroyo kontinuo pa un empleado keda relevante pa e dunadó di trabou. Ta importante pa invertí den mas oportunidat di formashon i no laga negosashonnan di CAO trata solamente e kompensashon di kosto di bida di awor, sino tambe pa krea e abilidat i konosementu pa futuro. Hasi presupuesto pa estudio i formashon un parti struktural di e akuerdonan di CAO, pa asina mehorá e kalifikashonnan básiko riba e merkado laboral i, di e manera ei, tambe e kapasidat i posibilidat di un mihó entrada pa e empleado. Mi ta bisa esaki no pasobra no ta sosodé, sino pasobra nos mester intensifiká nos esfuersonan riba esaki.

Mi ke stimulá e representantenan di empleadonan pa sigui ku e trabou importante aki, pero tambe pa wak kritíkamente na nos mes ora ta trata di kolaborashon i unidat, pa benefisio di e trahadó ”.

Kontando awe 4 di m ei 2026, nos tin 361 dia ta separá sindikalismo na Boneiru for di Dia 1 di mei 2027. Reflekshoná i keda kòrda ku bo ta lider sindikal dor di trahadó, di trahadó i pa trahadó

FUENTE: NORWIN NÒCHI WILLEM