KOMUNIDAT ENFERMO

Kralendijk,- Ta tempu pa hasi un estudio fuerte di e komunidat boneriano pa sa ki ta e faktornan ku ta pone ku nos no ta koperativo, ta gusta tira falta riba otro, ta diskriminá otro nashonalidat, no ta respetá esnan di otro orientashon seksual, no tin nada di rèspèt pa otro su pensamentu, no ta hiba debate sino pleitamentu kargá ku zundramentu i akusashon.

Sin hasi estudio lo sali un sabí bisa e kosnan aki ta mará na historia di sklabitut. For di kua estudio di sklabitut na Bonaire e pensamentu aki ta sali ta keda un misterio.

Historia ta karga kulpa ku nos komportashon ta manera e ta i mi ta sinti na hopi okashon ku nos ta orguyoso di esei. Asta mi ta pensa ku ta esei lo ta e famoso identidat boneriano ku ta trata pa definí. Defuntu Paps Capriles a trese dilanti ku Bonaire ta “Politiek ziek”.

Na mi konsepto Bonaire ta “Sociaal-Cultureel ziek” Kon kritiko nos ta ora ta trata ; religion, medionan di komunikashon, medionan sosial, patronchi di konsumo, enseñansa, papiamentu i historia. Si nos ta papia di nos norma i balornan dikon no ta menshoná nan.

Poniendo énfasis riba pasado, identidat, norma i balor ta hasi nos nashonalista ku orguyo falsu. Nos no ke mira ku nivel di edukashon/enseñansa na Bonaire ta defisiente i dependiente.

Loke mi ta mira i ta hasi mi kontentu ta hóbennan inventivo, ku pensamentu, idea i fantasia ku ta enserá mensahe dirigí riba un futuro briante. Hubentut a kibra ku e ko’i kèns “konosé bo pasado pa forma bo futuro” . E mensahe ta “Konosé bo mes”.

FUENTE: ARTHUR SEALY