KRÍSIS POLÍTIKO NA BONEIRU: RESTORASHON DI ÓRDEN ADMINISTRATIVO TA E ÚNIKO KAMINDA KOREKTO, NO NOMBRASHON DI UN DIPUTADO ÈKSPERTO EKSTERNO

Kralendijk – Ku sierto asombro i sorpresa a tuma nota di e proposishon pa solushoná e krísis gubernamental aktual dor di nombra un asina yamá diputado profeshonal (vakgedeputeerde), un èksperto finansiero.

E proposishon akí ta un menospresio di e kousa berdadero di e problemanan i un presedente peligroso ku lo eleminá responsabilidat polítiko. E ta un elemento teknokrátiko ku ta mina responsabilidat demokrátiko i ta redusí un problema polítiko na un asuntu meramente tékniko.

E kaida resien di e koalishon i e instabilidat finansiero andando no a kai for di shelu. Nan ta konsekuensia direkto di un maneho polítiko destruktivo di e anterior lider di koalishon, kende su estilo di goberná a kousa huida di un staf sumamente kapas i eksperensiá na e servisio di Finansa. Esaki a kousa un kaos ku tabata di spera den e maneho finansiero. Manera e hulandes sa bisa:’Laten we mekaar geen Mietje noemen’.

Ta un eror di pensa ku e solushon ta pa temporalmente kontratá un diputado èksperto eksterno. Un paso asina lo manda e señal robes: ku polítika mes no ta kapas pa karga su responsabilidat. Esaki ta inkorekto i ta mina e konfiansa den nos sistema demokrátiko. E aktual diputado di Finansa, aunke e no ta un spesialista finansiero, ta demostrando ku e intenshon korekto i boluntat polítiko e proseso di rekuperashon por wòrdu inisiá. Esaki ta mustra unda e solushon ta: tuma e pasonan korekto i pragmátiko ku e interes di e pueblo boneriano na bista.

Nos no ta pleita pa e aktual diputado asigná pa M21 keda ku e portofolio di Finansas. Sentido komún ta preskribí ku esaki mester keda entregá na e partido ku mas asiento den e próksimo koalishon. Ta lógiko ku esaki mester bai den man di e partido ku mas asiento den e koalishon. Den mesún rosea mester bisa ku e partido mas grandi aki ku ta UPB, mester por komprondé ku laga M21 ku un diputado ta trese trankilidat polítiko ku tantu pueblo ta anhelá. Òf mester ta asina ku frakshon Serberie lo bai sostené un koalishon di UPB-MPB sin èksigí un diputado.

Den e diskushon akí, e ròl di e kolegio di supervishon finansiero (Cft) ta krusial. Cft ta funshoná komo un supervisor independiente di e salú finansiero di e isla. Nan konsehonan negativo resien i e rechasó di e presupuesto no ta un atake riba polítika, sino un señal nesesario i ophetivo ku e fundeshi no ta na òrdu.

Cft no ta pidi pa un ‘gobernante-èksperto’. Cft ta pidi pa: Un presupuesto kuadrá i realístiko, un atministrashon finansiero sólido i Raportahe konfiabel i na tempu.

Esakinan ta tareanan ku primordialmente ta pertenesé na un aparato públiko (ambtenarenapparaat) profeshonal i bon ekipá. E ròl di polítika ta pa fasilitá e aparato akí, dirigí’é i karga e responsabilidat polítiko final. Cft ta funshoná komo e spil ku ta wòrdu tené dilanti di e kara di polítika boneriano: si e refleho no ta bon, ta polítika mester aktua, no remplasá e spil ku un potrèt temporal.

E úniko solushon duradero pa e krísis aktual ta pa restorá e situashon di promé ku 2023: Invertí den e Organisashon Atministrativo: Mester traha ku urgensia na rekonstruí un servisio di Finansa fuerte i profeshonal. Esaki ta e motor di un finansa públiko salú.

Tuma Responsabilidat Polítiko: Konseho Insular mester skohe pa gobernantenan ku ta komprondé e importansia di un organisashon stabil i ku ta kolaborá di forma konstruktivo ku e aparato públiko.

Ataká e Kousa: E komunidat polítiko mester isolá i rechasá e liderasgo destruktivo ku a kousa e krísis akí. Ta e ora ei so por restorá konfiansa.

Nombra un èksperto eksterno ta un pleister riba un herida profundo. Ta tempu pa kura e herida dor di ataká e kousa: restorá òrden gubernamental i atministrativo, tuma responsabilidat polítiko i mustra pueblo di Boneiru ku su lidernan skohí por, ta tribi i tin kurashi pa solushoná e problemanan nan mes.

FUENTE: WILLEM A. CECILIA