ARTI DE VRIES TA BOLUNTARIO DI AÑA

 Kralendijk,- Djasabra 6 di desèmber 2025, Plataforma NGO Boneiru a organisá un Festival di Boluntario na Biblioteka Públiko Boneiru.

E festival tabata pa selebrá e forsa i kompromiso di boluntarionan ku ta dediká nan mes diariamente na komunidat boneriano.

 Hopi boluntario den representashon di nan NGO tabata presente na e atardi festivo i inspirativo akí. Nan a tuma e oportunidat pa topa otro i interkambiá pensamentu.

 Pa basta aña kaba Plataforma NGO a bin ta rekonosé boluntario di aña riba Dia internashonal di Boluntario. Plataforma NGO a pidi su miembronan pa nan nominá e persona ku segun nan tin di keda rekonosé komo boluntario di aña.

 Plataforma NGO ta partí den sektor i asina ta skohe e boluntario di aña tambe.

 Pa 2026 a sali pa sektor boluntario di aña:

 Sektor di Arte i Kultura – Wesley Sint Jago.

Sektor di Naturalesa I Medioambiente:

Igor Woestenburg.

Sektor di Desaroyo Sosial: Ordina Gomez-Bernabela.

Sektor dI  Hóben, Famia i edukashon: Janny Rombley.

Sektor di Kuido I Bienestar: Evert Piar.

Sektor di Deporte I Rekreashon: Aris Ventura.

Ganadó apsoluto di e aña aki ta Arti de Vries.

Arti a keda nominá pa su dedikashon i trabou inkansabel pa Bonaire Sailing Club, Mangrove Maniacs, Mivabo i Proyekto di reforestashon riba Klein Bonaire. Kasi tur dia Arti ta hasi un trabou boluntario. No solamente pa organisashonnan pero tambe di su kurason. Asina Arti ta kana kosta pariba kasi tur siman pa kolekta sushi ku ta drif subi nos kosta. Den temporada ku sagasum yega tera ei tambe Arti ta kasi tur dia ta saka sagasum.

 Pabien na Arti ku e logra grandi aki I sigui asina.

FUENTE: FITTIPALDI PIETERSZ/LIVE909FM