TRAHADÓ KU TA MIEMBRO DI UN SINDIKATO TIN E DERECHO DI SA I TA NA ALTURA KIKO E SINDIKATO POR HASI PE.

Kralendijk,- Esaki ta laga e trahadó komprondé e balor agregá ku e sindikato tin pa su persona i e ta siña ki balor su kontribushon tin i kon ta usa e kontribushon ku e ta paga mensualmente.

Na promé lugá ta bon pa e trahadó/miembro sa ku den e statuto di su sindikato tin un obligashon pa e direktiva tur aña duna kuenta i rason finansiero na reunion general di miembronan.

Esaki ta tuma lugá na momento ku e tesorero ta traha su kuenta anual i ta laga un accountant kontrolé i duné un deklarashon di aprobashon. Ku esaki e direktiva ta tuma un desishon i e kuenta anual ta keda ofishalmente stipulá i ta na disposishon di tur miembro.

Durante e reunion general statutario e kuenta anual aki ta bin riba mesa i ta keda diskutí pa miembronan ku finalmente lo duna aprobashon na e maneho finansiero ku e direktiva a hiba. Ku e aprobashon ei e direktiva ta haña deskargo di su maneho.

Lòs for di gastunan diario ku mester paga manera entre otro, mantenshon di edifisio, awa koriente, internèt, kosnan di bebe, biahenan abogado na momento di konflikto, kursonan ets. Direktiva di e sindikato por ofresé e siguiente servisionan na su miembronan.

Asistensia hurídiko den kaso ku tin un konflikto ku mester bai korte. Konsehonan pa situashonnan laboral ku por presentá na boka di trabou, skirbi karta pa e miembro den kualkier situashon. Tambe e trahadó ta risibí konseho na kua instansia e mester bai, dependiendo di e situashon ku e presentá. Konsehonan pa bai ofisina di minsiterio di asuntunan sosial pa haña informashon tokante penshun di behes, ònderstant, pero tambe informashon tokante konflikto laboral i derechonan di e trahadó, inspekshon laboral pa duna keho kontra abuso i eksplotashon laboral, ets.

Tambe e sindikato ta buska mas tantu ku e por kompanianan ku ta dispuesto di duna deskuento speshal na miembronan di e sindikato na momento nan presentá nan tarheta di miembresia ora di pago pa produkto o servisio na e kompania.

Pa hasi esaki den un forma organisá e sindikato ta informá su miembresia dia i ora ku ofisina di e sindikato ta habri i ku lo tin hende pa atendé ku e miembro ora e yega.

Den esaki tambe sindikalismo modèrno ta duna un ehèmpel di ta hasi esfuerso pa hisa nivel i kalidat di sindikalismo i krea un imahen positivo. Nos mester mira sindikalismo komo un kompania di seguro, pero ku su enfoke riba kondishonnan i sirkumstansianan laboral.

Primeramente pa esakinan bo ta paga bon kontribushon ku ta manera e prima ku bo ta paga pa kualkier seguro. Prima pa seguro di malesa ta dunabo akseso na kuido médiko, prima pa seguro di outo ta dunabo garantia ku si bo hasi daño na outo di otro hende òf na esun di bo mes ku seguro ta kubri parsial òf kompletamente e daño.

Prima pa seguro di kas kontra kandela òf kualkier kalamidat di naturalesa manera teremoto, orkan, warwarú, ets. ta kubri e daño ku esakinan por kousa. Pues bo kontribushon ta e prima ku bo ta paga bo sindikato pa e kuida, protehá i defendé bo derechonan laboral, pero tambe pa e lucha pa mehorá bo kondishonnan i sirkumstansianan laboral i para pa rèspet, rekonosementu i rekompensa hustu pa e trahadó i su famia.

Mirando tur esaki mester yama pabien na ABVO ku a sigui e mesun liña di pensamentu aki i a anunsiá ofishalmente dia i ora ku nan ofisina ta habri pa ofresé servisio di asistensia na nan miembresia. Awor ta keda na e miembresia pa hasi uso di e servisio aki pa e tin kontinuidat i ku ta bale la pena pa sigui amplia e servisio ku mas produktonan ku por ofresé na bienestar di e miembronan. Ta netamente e idea aki USIBO a propagá den Diálogo Sentral i ku promé di mei último gobièrnu di Boneiru a anunsiá ku nan lo bai instituí un lokèt huridiko ku aksesibildiat fásil kaminda pueblo en general por akudí pa asistensia, sosten i ayudo hurídiko di kualkier indole.

Sindikalismo ta apoyá e idea ei pa 100 porshentu. Ohalá otro sindikatonan uni forsa pa nan miembronan tambe por benefisiá di e servisionan aki i asina duna balor na e kontribushon ku nan ta paga fielmente tur luna. Asina aki ku echos nos ta kumpli ku e lema SINDIKALISMO T’EI PA SIRBI e klase trahadó i su famia.

FUENTE: NÒCHI WILLEM