SINDIKALISMO NA BONEIRU KIER FELISITÁ I TA SOLIDARIO KU SINDIKALISMO DEN REINO HULANDES, ESTA FNV I CNV NA HULANDA, SINDIKATONAN NA ARUBA I E SINDIKATO DOEN NA KÒRSOU.

Esnan di Hulanda, esta FNV i CNV i esnan na ARUBA pa kumpli ku nan deber sagrado di sali an defensa di e pueblo en general i e klase trahdó en partikular (resolushon 144 di ILO di 1976). Na Hulanda sindikatonan a anunsiá ku lo bin un wèlga general si e gabinete Jette sigui persistí den su maneho pa bai tofer ku e lei di penshun pa asina spar plaka. E mesun gabinete Jette  ku kier spar plaka riba tur loke ta derechonan di e pueblo, entre kual penshun, enseñansa i kuido, a pone 27 miar pues pa nos komprondé bon. 10 euro tin un sero, 100 tin 2, 1000 tin 3, 10.000 tin 4, 100.000 tin sinku, 1 mion tin 6 i 1 miar tin 9 sero pa kumpra ekiponan i material pa defensa. Pues hinka 27 miar pa aweró bai guera mata hende i hasta mata hende inosente, manera hende grandi i mucha chikitu. Sindikalismo na Boneiru mester demonstrá solidaridat i kuminsá mobilisá nan miembresia ku informashon kiko esaki lo por nifiká pa e klase trahadó aki na Boneiru. Kiko ta bai pasa den nos enseñansa, esaki ta tarea di SIMABO pa buska tur info, kiko ta bai pasa den sektor públiko, esei ta tarea di sindikatonan ku ta representá empleadonan públiko. Kiko ta bai pasa den sektor di kuido, kaminda sindikatonan i dunadónan di trabou di e tres islanan ya pa algun aña ta trahando huntu pa alsa nivel di kuido i ku awor ta pará dilanti di un negosashon pa un CAO nobo. Nan tambe mester mobilisá henter e sektor. Mester mustra Hulanda ku ta nos plaka di belasten nos ta paga pa haña bon enseñansa i bon kuido pa tur nos hendenan i pa subi nos kalidat di bida. Nos no a duna nan ningun òrdu pa hinka tur e plaka ei den industria di guera. Aki na nos islanan nos mester di fondo pa nos hinka den sektornan ku ta hasi nos mas outosufisiente, entre kual serka nos produkshon di kuminda isigur PISKERIA.  E industria aki mester bira e  modelo ku ta produsí i ku ta hasi nos ménos dependiente di afó. Pues prepará e miembresia i  pueblo ku informashon i ta kla si ta nesesario pa akshoná.

E di dos felisitashon ta pa sindikatonan na Aruba ku independientemente di koló di partido ta dunando informashon na henter e pueblo di e posibel entrodukshon di un lei di Reino ku lo kita e independensia outónomo finansiero di Aruba. I na momento ku bo kita esei bo ta hasi Aruba un kolonia, manehá pa un pais aheno. I e triki ku kier usa ku ta den konsenso e ta bai, sindikatonan a rekonosé e zumbi na su pia. Korektamente sindikatonan ta boga ku si bo kier konsentimentu pa un kambio asina fundamental, esta di outónomo i outogobernashon pa kolonia, e úniko ku tin e derecho pa hasi esei ta pueblo arubano i no politikonan ku kasualmente ta na poder aktualmente i ta tuma un desishon ku lo por mara e pueblo pa siglos. Simplemente no por. I den esaki tambe sindikalismo na Boneiru mester ta solidario ku Aruba su sindikalismo. No lubidá ku 12 di mei 2023 nos a mobilisá pueblo pa igualdat den e konstelashon estatal ku a hinka nos, esta integrashon parsial pero sin konsenso di pueblo. I ta e mobilisashon ei gobièrnu  Hulandes a rekonosé i respetá i ku a bin kambionan fundamental den nos sistema sosial. Bos di polítikonan ta muchu mará na interesnan personal i partidista i den e asuntunan fundamental e bos di politikonan mester hala un banda pa bos di pueblo zona.

Por último felisitashon na e sindikato den enseñansa na Kòrsou DOEN, dirigi pa un dama hóben ku konseho di sindikalistanan veterano manera un Errol Cova i Kennet Valpoort. Un sindikato ku apénas 6 aña di eksistenia a krese di 31 miembro pa mas ku 500 miembro i ku despues di 6 aña ku orguyo ta hasi apertura di nan sede nobo. 500 dosente a para firme den union i solidaridat pa sali na defensa di e trahadó den enseñansa i manera sra. Phelipa a bisa no solamente pa kondishonnan material, manera salario ets, pero tambe pa e salú físiko i mental di e trahadó den enseñansa. Tambe e aserkamentu nobo no ta pa keda mustra riba e aspekto di miedo serka e trahadó pa e afiliá na un sindikato pero enfatisá e kurashi komo un don pa logra den bida dor di eduká i siña e trahadó konosé su derechonan. I keda kòrda e trahadó ku ta ku lucha so nos lo por kibra tur kadena ku mentalmente tin nos preso i ku ta ku lucha so nos por optené nos derechonan fundamental komo ser humano i ku ta ku lucha so nos lo por drecha nos kalidat di bida. Ningun poder lo regalá nos esakinan. Al kontrali loke nos ta sinti i eksperenshá ta ku diariamente ta purba kita nan for di nos.

Sindikato DOEN por sirbi komo ehèmpel pa nos aki kon ta organisá i engrandesé un sindikato den enseñansa. Miéntras ku FNV/CNV i sindikatonan na Aruba por sirbi komo ehèmpel ku sindikalismo tambe tin un tarea di vigilá ku polítika di pais ta traha semper na benefisio di e pueblo en general i e klase trahadó en partikular.  

FUENTE: NORWIN NÒCHI WILLEM