Redakshon
Kralendijk,- Ta e dia ku ta rekordá kon trahadónan balente a surpasá miedu, resistí menasa i intimidashon pa lanta para i bisa ta basta kontra e abuso i eksplotashon ku tabata tumando lugá.
1 di Mei ta konmemorá e movementu laboral pa lucha pa derechonan laboral, en partikular pa e 8 ora di trabou pa dia.
E esensia di Dia di Labor riba 1 di Mei ta pasobra ketu bai mester lucha pa protehá e klase trahadó i su famia i trese union den pensamentu di henter e komunidat pa krea ambiente di trabou salú i sigur. Banda di e partinan ofishal i tiramentu di diskurso 1 di mei ta sirbi komo un rekordatorio di e luchanan atraves di historia pa konstruí standardnan modèrno i enkurashá konsiensia kontinuo pa hustisia sosial.
Dia di Labor Internashonal ta ankrá profundo den sindikalismo. P’esei sindikalismo tin un deber i obligashon pa perkurá pa konmemorá Dia di Labor. Sindikalismo mester ta konsiente ku su eksistensia ta danki na e mensahe kontinuo ku ta manda diariamente pa e klase trahadó ku UNION TA FORSA i ta invitá tur trahadó sin ningun klase di distinkshon, pues a base di igualdat total, pa afiliá na un sindikato.
Ta ku e meta aki entre otro 1 di Mei 2012 a trese tur 7 sindikato ku ta operá na Boneiru huntu, esta AFBW, FEDEBON, ABVO BONEIRU, NAPB-BES, BPWU, PWFC I SIMABO pa konmemorá 1 di Mei, DIA DI LABOR.
Lamentablemente awor 14 aña despues ku sindikalismo na Boneiru a progresá i hasta ta riba kaminda di profeshonalisá, pa falta di liderato madurá ta parse ku e aña aki lo no ta selebrá Dia di Labor den UNION SINDIKAL. Mi ta bisa “ta parse”, pasobra kontrali na aña pasá no tin ningun movementu ni komunikashon den e direkshon ei.
Si ta bèrdat ku lo no selebrá e Dia di Labor e aña aki e lo ta un bòftá den kara di e klase trahadó i su famia i alabes un bèrguensa pa liderato sindikal di Boneiru. E eksperimento di aña pasá esta di drive through i alabes un akto seremonial kòrtiku den kurá di AFBW a resultá un inovashon éksitoso pa logra haña un partisipashon grandi di e trahadó i su famia. Kiko a pasa interno ku esaki no ta tuma lugá e aña aki.
Dikon no por a ripití e aktividat di aña pasá òf bin ku otro opshon inovativo pa logra e partisipashon grandi. Sindikalismo en general i sindikatonan individual en partikular debe e klase trahadó un splikashon. Bolbe bai bèk den e selebrashon individual di kada sindikato ta demostrá debilidat di liderato i ta debilitá e UNION ku tantu e klase trahadó meresé i mester pa enfrentá e retonan nobo ku lo por afektá su kondishonnan laboral.
Si mi memoria no ta lagami na kaya, na okashon di 1 di Mei 2025 dos promesa e klase trahadó a haña durante diskursonan ofishal i ku a keda risibí ku beneplásito; Nan tabata entrodusí PENSHUN GENERAL i un proposishon pa un ORDENANSA DI LEI PA DUNA E PLATAFORMA DIALOGO SENTRAL UN STATUS LEGAL.
Pregunta ta: E dos promesanan ei a bira realidat o por lo ménos tabatin diálogo riba nan entre e partnernan. A traha un proposishon di ordenansa tantu pa penshun general i esun di legalisá formalmente Dialogo Sentral. Sindikalismo a risibí invitashon pa duna su punto di bista riba e dos temanan aki?
I pa esnan ku ta trese dilanti ku e trahadó mes no ta asistí na aktividatnan di DIA DI LABOR, aña pasá a demonstrá ku si bin ku algu kreativo e ta hala e trahadó i su famia. Kisas por a hasi un enkuesta bou die klase trahadó pa e mes indiká kon e ke konmemorá su DIA DI LABOR. Al fin al kabo ta pa e klase trahadó Internashonalmente a instituí 1 di Mei.
Pero keda sin hasi nada riba DIA DI LABOR no por ta un opshon. Ta bon pa USIBO, pero tambe esnan no afiliá na USIBO duna un splikashon.
Martin Luther King a yega di bisa: Sea nos ta para huntu den UNION ÒF NOS TA BAI ABOU HUNTU. Esaki ta pa ilustrá ku forsa di sindikalismo ta sintá den e akshonnan kolektivo di su miembronan.
E ta hasi un yamada na liderato sindikal pa laga interesnan o sentimentunan personal un banda i tene otro su man i traha huntu pa UN META KOMUN, apesar di posibel opstákulonan
FUENTE: NORWIN NÒCHI WILLEM/LIVE99FM
GIPHY App Key not set. Please check settings