KÒRSOU KOMO ANFITRION PA REUNION DI IOC/UNESCO

Willemstad,- Durante e siman di 20 pa 24 di aprel, Kòrsou lo ta anfitrion di e di 19 reunion Internashonal relashoná ku peliger di Tsunami den Karibe i bisindario (ICG/CARIBE-EWS XIX).

Durante e reunion, ekspertonan regional, internashonal i maneho di desaster, lo reuní pa analisá i reforsá preparashon pa tsunami i resilensia den Karibe.

E meta prinsipal di e reunion ta:

1. Konsientisá komunidat aún mas riba riesgo di tsunami.

2. Mehorá sistema di alerta tempran i strategia di komunikashon.

3. Koördiná mekanismonan di akshon efektivo den situashon di emergensia.

4. Apoyá implementashon di United Nations Decade of Ocean Science pa Desaroyo Sostenibel (2021–2030), ku meta pa hasi komunidat na kosta resiliente pa 2030.

E delegashonnan di isla i paisnan partisipante ta inkluí Kòrsou, Aruba, St Maarten, Merka, Fransia, Colombia, Trinidad & Tobago, Repúblika Dominicana, Haiti, Guyana,  Puerto Rico, i otro paisnan di Karibe, ku partner internashonal manera UNESCO-IOC, Caribbean Tsunami Information Centre (CTIC), i International Tsunami Information Center (ITIC).

Alabes riba 20 i 21 di aprel lo tin e di 2 konferensia di rekonosementu pa Tsunami Ready ku lo kubri e pasonan pa un komunidat implementá pa asina por risibí e plakat di Tsunami Ready.

Servisio Meteorológiko di Kòrsou komo e sentro di alerta nashonal ta preparando aktivamente pa e konferensia i reunion aki, ku ta inkluí monitoreo di tsunami, alerta tempran i programanan pa konsientisá komunidat, pa asina Kòrsou ta prepará pa sirbí komo anfitrion i modelo pa preparashon pa tsunami den region.

Aktividat públiko:

Riba 22 di aprel 2026 anochi, na University of Curaçao (UoC), lo tuma lugá un lektura titulá “Nos tambe mester prepará pa un Tsunami?”, pa asina nos komunidat por haña un mihó komprondementu di e riesgo di tsunami i importansha di preparashon. Akinan ekspertonan internashonal i nos ekspertonan nashonal huntu ku e públiko lo deliberá relashoná ku e tópiko.

Servisio Meteorológiko Kòrsou ta invita pueblo di Kòrsou pa keda pendiente pa mas informashon tokante e lektura interesante ku ta bai tuma luga 22 di aprel 2026.

FUENTE: SERVISIO METEOROLÓGIKO KÒRSOU/LIVE99FM