Redakshon
Kralendijk,- Akademia Apoyo pa Ekselensia den Karera Eskolar (di Fundashon Apoyo Edukativo Boneiru) ta invitá profesionalnan edukativo na Boneiru pa un tayer intensivo tokante e tema “Violensia I Abuso den Bida di Mucha”.
E tayer ta basá riba un definishon holístiko di violensia i abuso, i un enfoke integral riba su impakto den desaroyo di mucha i hoben. Lo profundisá partikularmente e impakto di violensia i abuso riba karera eskolar di mucha i hoben na Boneiru.
Violensia den bida di mucha no ta tuma lugá na un solo lugá. Violensia i abuso por tuma lugá den tur sitio i lugá unda un mucha ta pasa tempo: na kas, na skol, den sentro di deporte i rekreo, riba kaya, ets. Ademas, tin diferente forma di abuso: físiko, sikológiko-emoshonal, verbal, seksual, “on-line”, negligencia, kultural i institushonal. E impakto di violensia riba mucha por ta profundo i por stroba e mucha den su karera eskolar i den bida pa tempo largo.
Durante e tayer lo kontestá tres pregunta sentral:
- Pregunta 1: Kiko ta violensia i abuso, i kon esaki ta manifestá su mes den nos komunidat?
Lo repasá diferente definishon teóriko di “violensia” i “abuso” i krea un panorama real di esaki den bida di mucha na Boneiru huntu ku e partisipantenan.
- Pregunta 2: Kon violensia i abuso ta influenshá muchanan?
Tantu den sentido general (kognitivo, sosial, emoshonal, neurológiko (di selebro) i físiko) komo spesífikamente den nan trayekto eskolar (por ehèmpel kon abuso por debilitá abilidat di estudio i motivashon pa bai skol). Ademas, e tayer ta trata e manera kon nos historia di sklabitut a i ta sigui afektá violensia i abuso den nos komunidat: nos mester komprondé nos historia pa nos por komprondé e formanan di abuso i violensia den nos komunidat di awe.
- Pregunta 3: Kon por sostené mucha i hoben ku ta biba den violensia i abuso pa mas éksito eskolar?
E tayer ta trata formanan kon un edukadó por rekonosé si e mucha ta sufriendo di violensia òf abuso. Tambe, kuá strategia i método edukativo por usa pa efektivamente sostené mucha ku ta lanta den violensia i abuso.
Fundashon Apoyo Edukativo Boneiru a desaroyá un modelo integrá di sosten (e Modelo Wayaká) ku ta enfoká riba 6 area di desaroyo, 5 método di apoyo, i hasiendo distinshon den 5 etapa di edat. Ademas, e tayer ta profundisá riba “faktornan protektivo” ku ta yuda un mucha (òf adulto) kura, rekuperá i konstruí resiliensia despues di a eksperensiá abuso, negligensia òf trauma.
E tayer ta dirigí spesialmente riba: Mèntor, Teamleiders i Zorg-Coordinators” den enseñansa sekundario, Maestro general di enseñansa primario, Remedial teachers i demas profeshonal ku ta traha ku mucha i hoben den deporte, arte i rekreashon. Ta enkurashá tambe direktiva i kabesante di skol, trahadó di Departamento Komunidat i Kuido i FORMA pa partisipá.
E tayer ta:
- enserá 2 seshon ku ta riba djamars 14 di aprél i djaweps 16 di aprél 2026. Mester sigui ambos seshon
- orario: 6:00 – 8:30 pm
- tuma lugá na Avanti, Antriol.
- Den idioma Papiamentu.
- kosta: 40 $ (ku ta kubri 2 seshon di tayer (total 5 ora di tayer), material di estudio i sertifikado
Fasilitadónan ta: Desiree Manuel-Eliza i Vaughan Astwood.
Pa mas informashon i inskripshon, interesado por tuma kontakto ku nos organisashon pa medio di adrés di emeil: seob.bestuur@gmail.com. Duna nòmber i kandidat di persona ku ta registrá i si ta relevante, kuá organisashon nan ta representá.
E situashon ta serio. Muchanan ku ta lanta i krese den situashon di violencia i abuso na Boneiru mester di nos atenshon inmediato, nos kompromiso serio, dedikashon profundo, i un apoyo profeshonal bon fundamentá.
Huntu nos por hasi diferensia den bida di nos muchanan na Boneiru.
Direktiva di Fundashon Apoyo Edukativo Boneiru. Akademia Apoyo pa Ekselensia den Karera Eskolar
Patronisadornan: MCB Bank, Banco di Caribe, Curoil, i WEB NV Boneiru
FUENTE: FUNDASHON APOYO EDUKATIVO BONEIRU
GIPHY App Key not set. Please check settings