BO TA KLA PA UNI KU NOS I BIRA PARTI DI UN KAMBIO REAL NA BONAIRE?

Kralendijk,- Resientemente fundá pa e elekshonnan di 2027, Partido Pueblo Progresivo (PPP), un partido di derechonan humano, ta representá kambio real, kreando un generashon nobo di hendenan dediká.

Nos tim lo ta formá pa abogado, edukadó, artista, ofisial di órden públiko, empresario, trahadó, hóben profeshonal, lider di komunidat i siudadano di tur sektor di komunidat.

Nos ta buska hende pa uni ku nos tim, hende di tur edat, ku eksperensia òf sin eksperensia, boneriano òf no boneriano. Tur nashonalidat ta bon biní. A yega tempu pa un generashon nobo di lidernan komprometí i ku vishon, ku ideanan fresku, integridat i e kurashi pa move nos isla dilanti kolektivamente.

Pa hopi tempu kaba, nos a mira e mes siklo polítiko ripití su mes, e mes lidernan bulando di un partido pa otro, resiklando e mes ideanan i dunando e mes resultadonan, sin desaroyo signifikativo ni benefisionan real pa e pueblo di Boneiru. Boneiru no por move dilanti komo un isla próspero di 25,000 hende sin liderato fuerte, responsabel i ku vishon.

Nos mester di tur hende di Boneiru, latino, hulandes, ingles i tur esnan ku stima Boneiru, pa komprondé ku nos mester hasi esaki huntu i no tira falta riba otro. E identidat úniko, kultura i tur kos ku nos ta stima di Boneiru ta bayendo pèrdí. Komo Bonerianonan, nos ta un minoria i nos no por hasi esaki nos so. Nos mester di hende di tur nashonalidat na Boneiru pa uni ku nos moveshon pa krea kambio real i signifikativo.

Histórikamente, e partidonan polítiko aktual a sali for di un solo partido polítiko, ku ta Partido Demokrat (DP). Demokrat a fragmentá den tur partidonan polítiko di awendia ku a partisipá den e último elekshon.

Demokrat bou di liderato di Abrahamnan a split den UPB ku líder Ruman Ellis, ku despues a atkeri Ramonsito Booi for di e partido ADEN ku a frakasá. Despues UPB a split atrobe ku líder polítiko Elvis Sjin Asjoe den MPB.

Den e último elekshon, MPB a split atrobe ku líder polítiko Daisy Coffie den M21. Nan tur ta wordu manipula dor di Den Haag. Na 2017, e grupo di partidonan i lidernan aki di DP, MPB, UPB i M21 a bai di akuerdo pa laga Den Haag integrá Bonaire den Konstitushon Hulandes, efektivamente entregando nos poder di tuma desishon lokal riba nos isla.

Awor e mes lidernan di e partidonan aki—Nina den Heyer i Angelica Cicilia—a split atrobe pa forma un nobo partido pa e elekshonan di 2027. Ta hopi obvio: e mes karanan, e mes formanan di hasi kos, e mes lidernan, e mes konseheronan manera Burney Elhage, Nochi Willem i otronan, impulsá pa interes propio i e mes manera di pensa antikuá, sin ningun kambio real desde 2010.

Nos partido polítiko no lo inkluí ningun di e lidernan òf konseheronan resiklá di awendia ò pasado.

Boneiru meresé mihó. Si bo ta kansá di kada bes di nobo e mesun kos i bo ta kere den kambio, bo tin un lugá den e moveshon akí.

Huntu nos por kibra e siklo. Huntu nos por traha un futuro nobo. Huntu nos por trese kambio real na Boneiru.

FUENTE: JAMES FINIES