KRISIS GOBERNANTENTAL TA SERIO

Kralendijk,- Ainda ningun señal di parti di nos representantenan den Konseho Insular ni di nos gobernantenan den Bestuurscollege tokante e krisis serio ku lo afektá nos tardi o tempran i ku nos lo bai sintiele duru den loke ta oumento di kosto di bida riba nos isla.

Nos a mustra riba e oumento drástiko di preis di transporte marítimo for di Merka, miéntras ku no mester deskartá e mesun oumento aki for di otro partinan di mundo for di unda nos na Boneiru ta importá produkto.

Entre tantu gasolin a subi, koriente i awa a subi kaba i preisnan den supermerkado ta for di kòntròl, Sindikalismo a sugeri pa e tres partidonan bin huntu den diálogo i pa nan konsiderá medidanan legal, bon informashon i un kòntròl i supervishon severo i ku tur tres ta karga e peso ekitativo den e tempu di krisis aki.

Manera e situashon ta aktualmente, ta un viktima so tin i esei ta e klase trahadó i su famia. Gobièrnu no ta sufri ya ku e ta sigui kobra belasten, sektor komersial no ta sufri ya ku nan ta mantené nan margen di ganashi dor di oumentá e preis di produkto i servisio.

Ta opvio ku e situashon aki lo bai krea intrankilidat riba e merkado laboral, ora ku trahadónan kuminsá preshoná nan sindikato pa bai mesa i negoshá mihó salario o a lo ménos adaptá e salario di tal forma ku nan ta mantené nan forsa di kompra i no ta haña nan den problema fin di luna pa paga nan gastunan básiko i fiho.

Pa no papia mes di e grupo vulnerabel den nos komunidat, esta kobradónan di ònderstant, penshun di behes i e trahadónan mas abou den e kas salarial di un kompania.

Komo parti integral di Ulanda, sindikalismo a tuma nota ku na Ulanda Oropeo tambe nan ta konfrontando problema ku abuso i eksplotashon di trahadónan imigrante ku ta keda kontratá pa bin yuda riba e merkado laboral.

Ounke nan sirkumstansianan ta otro, nos por a tuma nota ku dunadónan di trabou i sindikatonan den Konseho Sosial Ekonómiko, esta S.E.R. a formulá un konseho pa gobièrnu Ulandes den kual nan ta proponé 10 punto pa enfrentá e fenómeno aki.

E puntonan un biaha mas ta resultado di e sirkumstansianan na Oropa, pero ta bon si pa nos analisá i evaluá nan i wak kua di nan ta aplikabel i kiko nos mes tambe por hasi pa atendé ku e problema aki den nos komunidat.

E konklushon pa loke ta e trato di imigrantenan na Ulanda ta komparabel ku nos situashon, esta e forma ku ta trata imigrantenan ta simplemente malu i huntu ku e imigrantenan sindikalismo por nifiiká e diferensha i esei ta traha pa  mehorá nan posishon.

Nos merkado laboral ku tambe a bira hopi fleksibel ku kontraktnan kòrtiku, nul-urencontract, oproepcontract, ets. a hasi posibel ku por usa trahadó i despues hisé benta afó i buska otro imigrante.

Hopi ta e kasonan ku no ta paga e imigrante e sueldo legal òf ta retené na un manera illegal sèn for di su salario.

Kasnan ku nan mester biba aden ku nan 8 òf mas, sirkumstansianan laboral bou di kua nan mester traha, violando hopi lei di seguridat ta e realidat di 2026. Un di e puntonan di atenshon den e konseho di SER na gobièrnu Ulandes ta un areglo legal pa sindikalismo por drenta.

Nan ta mustra riba e importansia pa fortifiká e ròl di sindikalismo den sosten na e imigrantenan, sigur esnan mal pagá i ku no konosé nan derechonan na momento di konfliktonan laboral. Sindikalismo ta mas serka e trahadó i den nos kaso por yuda e imigrantenan ku no ta dominá ulandes.

Ta na gobièrnu di Boneiru pa fasilitá i sostené sindikalismo den ehekushon di nan ròl. ‘Por i mester bin un kambio. Mester bin un fin na e konstrukshon intransparente aki “

FUENTE: NORWIN NÒCHI WILLEM