BONEIRU SU BOS TA RESONA NA NASHONAN UNÍ: PRESIDENTE DI BHRO TA DIRIGI CSW70 RIBA PAS, HUSTISIA I LIDERAZGO DI HENDE MUHE. 

Kralendijk,- E Presidente di Bonaire Human Rights Organization, Davika Bissessar Shaw, a duna un diskurso fuerte i elokente durante un Diálogo di Nivel Haltu na e 70 Seshon di e Komishon di Nashonnan Uní pa Status di Hende Muhe (CSW70), tení na United Nations Church Center New York

Durante su intervenshon na e diálogo “E Rol di Hende Muhe pa Logra un Tratado Global di Pas basa riba No- Violensia”  organisá pa PANGEE ONG i International Public Diplomacy Organization, Presidente Bissessar Shaw a resaltá e importansia di liderazgo di hende muhe, dignidat i hustisia, miéntras ku el a trese atenshon internashonal na e bos i lucha pasífiko di e pueblo di Boneiru.

Den su remarkanan, el a bisa:  “Nos lucha ta keda pasífiko, guiá pa dignidat, hustisia i e konvikshon ku lei internashonal mester protehá asta e pueblo mas chikí i mas vulnerabel.”

Presidente Bissessar Shaw tambe a resaltá e papel vital ku hende muhe for di komunidatnan di isla chikí ta hunga den defendé derechonan humano, igualdat i solushonnan pasífiko den e sistema internashonal.

E Peace Charter Initiative ta promove no-violensia, diálogo i protekshon di bida i dignidat humano pa medio di partisipashon inklusivo di komunidatnan, sosiedat sivíl, pueblo indígena i partnernan internashonal den prosesonan pasífiko. Su prinsipionan ta reforsá un lucha pasífiko basá riba lei internashonal i derechonan humano den e sistema di Nashonan Uní pa sigurá ku e bos, dignidat i futuro di e pueblonan manera esun Boneriano ta wordu respetá.

Partisipashon di Bonaire Human Rights Organization na CSW70 ta sigurá ku e bos di e pueblo di Boneiru—spesialmente hende muhe—ta wordu tende den diskushonnan global riba hustisia, igualdat i dignidat humano. CSW ta e prinsipal organismo di Nashonan Uní ku ta promove igualdat di hende muhe i empoderamentu di hende muhe.

Presidente Bissessar Shaw di BHRO ta hasi un yamada na hende muhe di Boneiru pa uni na e movementu pa dignidat humano i hustisia. Partisipá den nos tayernan pa bira Instruktor di Derechonan Humano i Embahador ofisial di BHRO, empoderando komunidatnan pa medio di edukashon i abogasia.

Nos meta ta pa train 5,000 persona pa 2030 pa medio di nos tayernan di derechonan humano i kùrsonan pa instruktornan, den linea ku e Obhetivonan di Desaroyo Sostenibel di Nashonan Uní (SDGs).

FUENTE: BONAIRE HUMAN RIGHTS ORGANIZATION