HUBENTUT DI RINCON MERESÉ UN VÈLT DI BEISBÒL SIGUR

Kralendijk,- Komunidat di Rincon kier mustra su preokupashon grandi tokante e estado aktual di e vèlt di beisbòl na Rincon.

Beisbòl ta un deporte hopi importante pa nos hubentut, pero pa motibu di e mal kondishon di e vèlt, nos muchanan no por entrená ni hungá na un manera sigur i adekuá.E estado di e vèlt ta hasi entrenamentu bira difísil i asta peligroso.

Esaki ta nifiká ku nos hubentut no tin e mesun oportunidat manera otro muchanan di otro team nan na Boneiru pa prepará nan mes bon pa torneo i kompetensia.

Nos muchanan tin talento i ta traha duru, pero sin un vèlt adekuá nan desaroyo ta limitá.Ku gran desilushon nos a tende ku e vèlt di beisbòl di Rincon no ta riba e lista di proyekto di VWS pa un renovashon kompleto. Pa un komunidat kaminda beisbòl ta forma un parti importante di bida di hopi hóbennan, esaki ta difísil di komprondé.

Den pasado nos a hasi vários intento pa drenta den diálogo ku Indebon pa buska un solushon huntu. Desafortunadamente, te awor e esfuersonan aki no a resultá den mínimo mehorashon konkreto.Nos ta hasi un yamada urgente na gobièrnu pa tuma su responsabilidat i aktua.

Asta un solushon temporal, manera pone un kapa di santu/ greis riba e vèlt pa hasié usabel atrobe, lo por hasi un gran diferensia pa nos muchanan.

Hubentut di Rincon meresé e mesun oportunidat manera tur otro muchanan riba Boneiru: un lugá sigur pa entrená, desaroyá nan talento i representá nan komunidat ku orguyo.Nos ta yama riba gobièrnu i instansianan relevante pa tuma e situashon aki na serio i bin ku un solushon mas pronto posibel.Komunidat di Rincon lo sigui defendé interes di su hubentut te ora nos mira un mehorashon real.

FUENTE: MAYORNAN PREOKUPA