BO NO MESTER DI INFORMA BO DUNADÓ DI TRABOU KU BO TA AFILIA NA UN SINDIKATO.

Kralendijk,- Despues di a dediká kuater kolumna na e esfuerso ku dunadó di trabou i su tim ku koperashon ku sindikato mester hasi pa logra un ambiente di trabou, sigur, saludabel, kaminda ta duna rèspèt na e trahadó, kaminda ta duna rekonosimentu di e balor di e trahadó i kaminda ta paga e trahadó un salario hustu pa e por hiba un bida digno komo hende, awe nos ta kuminsá na denunsiá abusonan ku ta sosodé kontra e trahadó ku ta indefenso pasobra e no ta afiliá na un sindikato.

I tanten ku e trahadó mes no realisá ku afiliá na un sindikato ta un derecho sagrado di dje i no di ningun otro hende, e lo tin ku keda sinta bou di e palu i sigui soportá sushi di e para. Mi kier bolbe primi den mente kuraso i alma di e trahadó. BO NO MESTER DI INFORMA BO DUNADÓ DI TRABOU KU BO TA AFILIA NA UN SINDIKATO.

Meskos ku tampoko bo ta informé ku bo tin un seguro di outo/kas, òf ku bo ta katóliko, protestant òf pentekostal, òf ku bo ta simpatisá Real o Flamingo, òf ku bo ta vota UPB, DP òf e partido nobo na kaminda. No ta su asuntu.

Su asuntu ta ku ora e tumabo na trabou e perkurá pa tin un ambiente di trabou sigur i saludabel, perkurá pa bo ta haña e rèspèt i rekonosementu ku bo meresé i pagabo un salario i otro kondishonnan di trabou hustu.

Abo su deber ta pa kumpli kabalmente ku bo responsabildiatnan duna e rèspèt nesesario na tur hende i hasi bo trabou i mas pa e kompania krese di moda ku bo tambe ta krese ku e kompania.

Si kada trahadó sigui e konseho positivo aki, den un tempu rèkort mas ku mitar di e kantidat di trahadónan lo afiliá na un sindikato i legalmente for di e momento ei ta e SINDIKATO ta representá tur e trahadónan legalmente i ta e sindikato legalmente ta bai atendé tur loke ta kondishonnan i interesnan laboral di tur e trahadónan.

Bo mes personal no mester enfrentá e dunadó di trabou mas. Bo ta bon protehá meskos ku ta den un seguro bo ta. E seguridat i protekshon aki no tapa bo kere ku bo por hasi loke bo ke pasobra bo ta den sindikato. Nò, apsolutamente ku nò. Tanten bo ta kumpli ku bo debernan bo por eksigí sin bèrguensa kumplimentu ku bo derechonan.

Den fin di siman nos a haña un akuerdo laboral mira i lesa i kiko nos a konstatá E akuerdo ta firmá 1 di yanuari 2023 ku un pago pa luna di USD 1.400 dòlar. Entre tantu e sueldo minimo legal i obligatorio pa lei ta ta USD. 10,69 pa ora ku ta USD. 1.852.57 pa luna a base di 40 ora pa siman.

Ta di spera ku entre tantu e kompania a adaptá e USD 1400 na e suma nobo. Mas aleu mi ta mira den e akuerdo ku si SZW no deklará e trahadó AO (ousente pa malesa) e no ta risibí pago. Mi kier rekordá ku SZW su areglo ta drenta despues di e di tres dia ku e trahadó ta malu.

E promé tres dianan e trahadó lo mester risibí su pago normal a ménos ku e drenta un areglo ku e dunadó di trabou òf e ta akordá den un CAO.

I masha importante ta tambe ku si e dunadó di trabou no raportá e trahadó komo malu for di e promé dia e ta keda totalmente responsabel pa paga e salario kompleto.

E di dos kos ku mi a mira i lesa ta ku a pone den e akuerdo laboral ku no ta  paga trahamentu di overtaim ni tampoko oranan irregular di trabou.

Na promé lugá pago di overtaim ta obligatorio si ta e dunadó di trabou a pidi esaki. Por yega na un areglo tambe di taimbèk. Pues bo ta haña e overtaim den tempu/oranan liber. Hasta ta asina ku si bo tin un kontrakt di 40 ora pa siman i 6 luna largu bo ta traha 44 ora pa siman, mester adaptá e kontrakt. Pago di oranan irregular ta konta hopi biaha pa trahadónan di warda òf pa esnan ku insidentalmente ta traha overtaim. E ta mas un pago èkstra pa kompensá ku e trahadó ta duna mas di lo normal. Pero keda sin paga ètòl ni duna bèk na tempu ta abuso i eksplotashon di trahadó. Si bo ta afiliá na un sindikato hamas i nunka un areglo asina por ta den CAO i si mes bo a firmé den un kontrakt apart, e CAO ta eliminá e artikulo ei den bo kontrakt.

Si abo ta kere ku bo a firma un kontrakt ku ta enserá abuso i/o eksplotashon, saka un kopia i pasa lagé na ofisina di AFBW na mi nòmber i mi lo analisé i  evalué pabo. Probechá mesora pa inskribí i bira miembro. Ta probecho i benefisio so lo bo por tin. Na e dunadónan di trabou di mala fe, mi ta manda e mensahe aki. Trabou ta di gran balor, no un instrumentu pa bo hasi ganashi riba lomba di e trahadó.!”

FUENTE: NORWIN NÒCHI WILLEM