FONDO DI SKLABITUT  100 MION

Kralendijk,- A bira konosí ku di e 33.3 mion ku tin den e fondo di sklabitut pa e islanan den Karibe a honra tres proyekto di Bonaire.

Di ken, di kua grupo i ki tipo di proyekto nan ta no ta konosí. E fondo ta pa investigá kontinuashon di sklabitut den nos komunidat.

No ta bai pa wak atras sino wak rondó nos pa nos bai dilanti, pa kambio, progreso i adelanto eksaktamente pa tantu desendientenan di esnan liberá na 1863 i di esnan ku tabata doño di katibu. Grupo di diálogo Bonaire su proyekto ta un monumento ku famnan ku e personanan liberá na 1863 a haña. Ta famnan ku te awe tin na Bonaire i si bo ke òf no ke e fam ei ta konektá abo ku 1863.

Ami ta konektá ku Janga, Kroon, Sint Jago i Kroon i tur ta di Rincon. Grupo di diálogo Bonaire a trese su pensamentu dilanti den forma di komunikado, kombersashon di mesa, programa Kadena invisibel na televishon, serka Konseho Insular, Kolegio Ehekutivo. Gezaghèber i Kordinadó Nashonal di Rasismo i Diskriminashon.

Ta e mihó manera di komunikashon pa konsientisá nos abitantenan di nos historia i haña sosten pa karga e proyekto.

Otro forma pa hasi ganashi riba “sufrimentu” di pueblo ta un Denktank ku eksperto, konsehero i sientífikonan pa studia trouma komo konsekuensia di sklabitut. Kua ta nos konsehero, eksperto i sientífikonan ku famman manera Albertus, Anthony, Bernabela, Cicilia, Coffie,  Janga, Wanga por ehèmpel ku ta rekordá ku nan ta desendiente di katibu ta den e denktank .

Grupo di Diálogo a laga eksperto di Aruba i Kòrsou tene charla públiko riba e tópiko trouma. Nos tin trouma kousá pa e negoshi i trato humiliante ku meta komersial i trouma polítiko kousá den konstelashon Antiano.  

Loke nos ta mira ku asuntu di fondo di sklabitut i Denktank a bira un modelo pa gana sèn riba graf di nos antepasadonan. Ehèmpelnan ta, skibimentu di Buki di historia i Kánòn pa algun hende gana sèn i elogio.  Si nos ta kritiká Hulanda ku a bira riku pa medio di sklabitut, awor nos ta hasi meskos ku ta mas ku tristu.

FUENTE: ARTHUR SEALY