Redakshon
Willemstad – Durante su bishita di Kolegio mas resien, Kolegio di supervishon finansiero Kòrsou i Sint Maarten (Cft) a enfatisá e importansia di kontrol adekuá di e asina yamá entidatnan gubernamental.
Riesgonan finansiero serka e entidatnan aki por tin konsekuensianan inmediato i negativo pa e presupuesto nashonal. Cft ta urgi Kòrsou pa desaroyá un polítika di partisipashon integral. Di e manera aki, Gobièrnu ta haña mas bista riba riesgonan, i mihó kontrol di ingresonan di dividènt. Supervishon adekuá i un aktitut aktivo di akshonista ta fortalesé e posishon finansiero di Pais.
Entidatnan gubernamental ta ehekutá tareanan importante pa sosiedat. Na mes momentu, nan por trese riesgonan finansiero pa Pais ora maneho finansiero no ta adekuá òf si otro tipo di problemanan surgi. P’esei, supervishon adekuá ta esensial.
Cft ta señalá ku den e presupuesto pa 2026, a inkluí solamente XCG 7 mion na dividènt di entidatnan gubernamental, miéntras e entidatnan aki huntu ta generá mas ku XCG 100 mion na ganashi. Esaki ta mustra ku Pais komo akshonista por dirigí mas aktivamente, por ehèmpel hasiendo akuerdonan kla tokante di distribushon di ganashi. Por usa ingresonan di dividènt adishonal pa metanan sosial importante, manera Gobièrnu di Kòrsou ta rekonosé tambe.
Servisio di Impuesto
Un aña pasá, Cft a urgi Pais pa atendé ku e problemanan serka Servisio di Impuesto aktivamente. Entretantu, Kòrsou a implementá algun kambio respekto di personal, sinembargo, no a hasi sufisiente progreso pa loke ta trata mehorashonnan struktural.
E kantidat di aanslagnan pendiente ta bolbe krese. Despues di e akshon di limpiesa na kuminsamentu di 2023, e saldo di debenan di impuesto i prima a baha di XCG 5,6 bion pa XCG 2,6 bion. Entretantu, e saldo aki a bolbe oumentá te aproksimadamente XCG 3,2 bion, loke ta nifiká ku e saldo pendiente ta mas haltu ku e ingresonan di impuesto i prima anual.
Cft ta enfatisá ku mester atendé ku e reforma di manera aktivo. Ku implementashon mas efektivo i legal, Kòrsou por oumentá e ingresonan di impuesto strukturalmente. Ademas, un sistema hustu den kua tur hende ta aportá, ta krea espasio pa redusí e karga di impuesto pa e komunidat di Kòrsou.
Surplus di presupuesto
Cft ta konstatá ku satisfakshon ku e kalidat di e presupuesto a mehorá. Entre otro danki na e sirkumstansianan ekonómiko aktual faborabel, Kòrsou ta kalkulá surplus presupuestario pa e próksimo añanan. Ta di sumo importansia pa en realidat logra realisá e surplusnan aki, pa asina fortalesé e presupuesto su resiliensia. Na mésun momentu e sirkumstansianan aktual ta forma un bon okashon pa ehekutá e reformanan nesesario asina fortifiká e kapasidat struktural pa kresementu ekonómiko.
FUENTE: CFT/LIVE99FM
GIPHY App Key not set. Please check settings