APERTURA AÑA SINDIKAL ABVO BONEIRU 2026

Kralendijk,- Djabièrnè 17 di yanüari 2026, ABVO Boneiru a habrí e aña nobo 2026 ku un mensahe di speransa i determinashon. Komprometé pa sigui defendé derechonan di trahadó i fortifiká sindikalismo na Boneiru.

Den su diskurso, sra. Tafila Janga, presidente di  ABVO Boneiru, ta  re-afirmá e kompromiso di sindikato ABVO pa sigui defendé derechonan di trahadó i pa fortifiká e movementu sindikal na Boneiru.

Sra. Tafila a amplia den su diskurso ku aña 2025 tabata un aña kaminda ABVO Boneiru a logra hopi di su metanan. Un aña ku a trese kambionan importante den nos plan stratégiko. ABVO Boneiru a registrá un kresementu den su miembresia i su direktiva ta kompletu den su forma. Nos tin ku yama danki na gobièrnu di Bonaire ku nos a logra ku gobièrnu ta paga e miembresia pa tur miembro ku ta traha na OLB.

Nos ta traha hopi aserka ku OLB. Pa e aña aki nos lo bai traha aun mas serka ku gobièrnu pa atendé algun asuntu ku kana ménos bon. OLB tin nos atenshon.

Den 2025, ABVO Boneiru a firma dos prolongashon di CAO. Den e akuerdo laboral ku RCN a logra firma dos kambio importante, ku mehorashon supstansial di salario i benefisio sekundario pa e empleadonan. Pa empleadonan di OLB a plantia e oumento di 5.5% ku RCN a kaba di negoshá pa su empleadonan. Tambe a introdusí un huki pa miembro, kaminda tur miembro ta bon bini pa hasi uso di tur fasilidat via kòmpiuter i Internet, manera skirbi karta i manda òf kontesta e-mail.

E aña aki ABVO ta selebrá su 90 aniversario, ku lo tuma lugá den forma di un selebrashon grandi. Miembronan ku ta interesá pa forma parti di e komishon di preparashon ta invitá pa registrá serka direktiva di ABVO Boneiru. Ademas, ABVO ta update tur datonan di su miembronan (e-mail i telefòn) pa garantisá komunikashon kontinuo i efektivo.

Aktividat i Eventonan Planiá pa 2026

• Enkuentro informativo den forma di happy hour huntu ku ACU
• Kurso i asistensia pa yena formulario di belasting
• Selebrashon di Dia di Hende Muhé
• Selebrashon di Dia di Hende Hòmber
• Selebrashon di Dia di Obrero
• Charla tokante salú
• Sekshon riba Smartengeld
• Kurso di Lei Laboral (Arbeidswet BES)
• Kurso di kòmpiuter
• Inougurashon di ABVO App
• Inougurashon di Skol Sindikal Erik Tjietjie

 Pa mas informashon wak nos página di ” face book “ i sòru pa bo datonan ta aktualisá serka nos

Sra. Tafila Janga ta enfatisá ku tur miembro tin ku karga i asumí su responsabilidat. Ora bo ta kumpli ku bo responsabilidat bo ta para fuerte den bo sapatu. Tuma akshon na momentu ku mester. Yega na ABVO na momentunan ku tin señal. Si bosnan no duna señalnan nos no sa ku bosnan mester di nos ayudo.

Sra. Tafila Janga ta terminá su diskurso ku e siguiente mensahe:

 “Ta bosnan ta forma e sindikato ABVO Boneiru. E direktiva ku mi ta presidí semper ta para kla pa sirbi bosonan. Direktiva ta manda un súplika grandi na tur miembro pa semper aserka bo sindikato na momentu ku kosnan no ta kana segun regla i akuerdo. Direktiva tei pa skucha i yuda pensa konhuntamente den kasonan kaminda tin inhustisia laboral. Por último mi ke yama un danki na bosnan tur esnan ku a aseptá e invitashon i  a asistí na nos apertura sindikal dia aña 2026. Nos lo sigui hasi esfuerso pa mirá miembro na nos aktividatnan i eventonan.

ABVO den su 90 ta sólido pa su miembronan.

ABVO ta un sindikato di fundeshi i rais.

FUENTE: ABVO/LIVE99FM