DJÁRASON 28 DI YANÜARI PA 2:00 PM KORTE NA DEN HAAG LO DUNA SU VEREDIKTO DEN E KASO DI KLIMA DI BONEIRU.

Kralendijk,- Esaki por bira un veredikto históriko ku por pone un presedente pa otro kasonan di klima. Esaki lo ta e promé kaso na Europa kaminda hues ta ordená un pais pa implementá un maneho di adaptashon: Hulanda e ora ei lo mester hasi mas pa protehá hende kontra e impakto di kambio di klima.

Ocho habitante di Boneiru i Greenpeace Hulanda ta eksigí un maneho di klima hustu di Estado Hulandes den e kaso di klima akí.

Nan ta argumentá ku Estado Hulandes ta violando derechonan humano dor di no brinda sufisiente protekshon kontra e konsekuensianan di kambio di klima. Via di hues, nan ta eksigí pa Estado Hulandes kontribuí ku su parti hustu i redusí emishon di CO2 te na sero mas lihé posibel, i tambe bini ku plannan konkreto pa protehá Boneiru.

Dia 7 i 8 di òktober 2025 e seshonnan den korte a tuma lugá, na kual e ocho demandantenan tabata presente. Na momentu di e veredikto tambe algun demandante di Boneiru lo tei presente, huntu ku e direktor di Greenpeace Hulanda, Marieke Vellekoop.

FUENTE:GREENPEACE