ARUBA: NOS MES POR MANEHA NOS FINANSAS, NO MESTER DI HOFA. DANKI NA E FUNDESHI FINANCIERO CU GOBIERNO DI MEP A TRAHA

Oranjestad – Durante conferencia di prensa, lider di fraccion di MEP Evelyn Wever-Croes, a trece padilanti cu e Team Financiero cu Gabinete Wever-Croes a institui te awe a sigui traha cu gran efectividad.

“Na varios ocasion Hulanda a purba tuma nos autonomia financiero over, pero nos a logra baha tur for di mesa. CHE, COHO, RAFT, tur tabata ideanan di Hulanda pa a traves di un ley di reino, kibra nos autonomia financiero y pasa esaki mas pa Hulanda. A traves di negociacionnan intenso, strategianan di nivel halto, y demostrando cu hechos y maneho responsabel cu nos mes por, nos a sigui cu Hulanda na mesa. Aruba no mester entrega su autonomia financiero pa por maneha nos finansas.  Aruba mester di un ley cu criteria moderno y condicionnan, pero tambe cu respet pa nos Status Aparte” tabata palabranan di lider di MEP.

Aruba a demostra na Reino y henter mundo cu nos a recupera y ta sigui recupera y fortalece danki na un bon base financiero estableci y e oportunidadnan cu nos Status Aparte, cu su instrumentonan estatal autónomo, ta ofrece. P’esey, ningun hende ta compronde e decision di e gobierno actual AVPFuturo di acepta e ley di reino HOFA, sin negocia. Un ley cu ta contra nos constitucion, y cu ta frena nos desaroyo economico.

“Despues cu nos, desde oposicion, a rechasa e ley aki, y a demostra cu prueba cuanto daño e ley aki lo haci Aruba, awor e gobierno a indica cu lo bay negocia bek cu Hulanda, despues cu nan mes a aproba esaki caba dia 28 di augustus 2025. Parse manera mi a bisa anteriomente; un barco sin capitan, sin plan di navegacion, sin bela y sin anker”. Nan a purba bende autonomia di Aruba pa haya un fondo cu Hulanda ya a nenga nos caba. Hulanda a bisa cu e debe mester sigui wordo paga bek y punto.

“Y lagami ta cla den esaki. Nos no tin problema pa paga Hulanda e debe bek pasobra e fundeshi cu nos gobernacion, bou maneho financiero di Minister Xiomara Maduro y su team a laga atras, lo sigui brinda Aruba stabilidad y surplus, pa nos por paga debenan di gobiernonan di Mike Eman y di Covid na Hulanda, sin tin mester di mishi cu derechonan estatal valioso di nos Status Aparte.

P’esey, awe mi kier felicita nos pueblo di Aruba cu e resultado financiero di e aña 2025 y di e projeccionnan di 2026 y mas padilanti.

E fundeshi stabiel estableci di nos gobernacion lo sigui produci, pa hunto nos por sigui comparti e bienestar.

Pabien maestronan, pabien nos grandinan, pabien Aruba!”, Evelyn Wever-Croes a termina bisando.

FUENTE: MEP/LIVE99FM