Redakshon
Kralendijk,- Den e aña ku ta terminando, nos por a tuma nota ku trahadónan den tur sektor a hasi un eskoho konsiente esta pa organisá nan mes pa drenta un sindikato, i pa tuma kòntròl bèk di nan trabou i bida.
E eskoho ei ta importante. No solamente pa esnan ku ya tabata miembro pero tambe pa esnan ku a djòin, pasobra e trahadó uní den un sindikato ta di suma importansia. Na tur miembro i speshalmente na e miembronan nobo di 2025: DANKI. Nos no por duna gratitut den silensio so, nos mester kontinuá ku nos akshon pa fortifiká e klase trahadó i esei ta solamente posibel den UNION. P’esei un yamada na trahadónan den sektor di hotèl, den sektor di konstrukshon, den sektor di seguridat, den sektor di pakus, den sektor di akohida despues di skol i den tur otro sektor, 2026 mester bira e aña ku sindikalismo na Boneiru lo mester krese supstanshalmente. E retonan ta grandi, pero igual ta e menasanan ku nos lo mester enfrentá.
E dikon bo miembresia ta importante ta simpel. Poder kolektivo ta fuerte i ta kambia resultadonan. E ta kondusí na salarionan hustu, orarionan desente, lugánan di trabou mas sigur i salú, e ta brinda protekshon kontra abuso i eksplotashon. Mas i mas dunadónan di trabou mester bai na rekonosé i respetá sindikalismo den nan kompania i stimulá nan trahadónan pa organisá nan mes. E trahadó mes tambe mester bula e sombra di miedu i kobardia i den solidaridat i ku kurashi bira miembro kolektivamente di un sindikato. Ta bo derecho fundamental rekonosé internashonal. Ta na kada un trahadó pa hasi uso di dje.
Trahadónan ku ta miembro i ku a bira miembro a tuma e riesgo pa nos tur por traha na lugánan di trabou mas sigur i hustu. Gratitut ta wòrdu ganá pa medio di akshonnan, no ku palabranan. Para huntu ku nan awor: defendé nan, i tuma akshon. Solidaridat no ta un sentimentu, e ta un práktika. Laga nos poné den práktika huntu. E akshon mas grandi ta engrandesé e union sindikal i bira miembro.
Tin un zonido ku ta resoná ora hende realisá ku nan no ta nan so. E koro konstante di bosnan ku ta uni, lanta i yena aire. Na 2025, e koro ei a krese. Trahadónan den kuido, dosentenan, trahadónan den seguridat i diferente otro sektornan a kontestá e yamada silensioso pa para huntu. E koro di bosnan den union mester sigui krese den 2026.
Djòin un sindikato ta un akto di fe i speransa . Fe i speransa den otro i ku kada miembro nobo ta demostrá kurashi komun: kombersashonnan na ora di bebe un kòfi, preguntanan ku ta keda formulá den e sala di pauze, enkuentronan sosial despues di trabou, e trabou di pasenshi pa konvensé un kolega ku huntu, ta skucha nos. E aktonan chikí aki ta krea un koriente, un koriente ku ta fortalesé nos union.
Tin un bunitesa den e tipo di kurashi aki. E
ta e bunitesa di mannan i mentenan trahando huntu den diferente funshon, e ta e bunitesa di insistí ku pago i rèspèt ta resultado di esfuerso. E kambionan por ta poné por eskrito den un CAO pero nan nifikashon ta humano: un mundu mas sigur i hustu pa nos komo trahadó. Den 2026 nos lo sigui pa duna kontenido na nos tres R-nan, esta Rèspèt pa e trahadó, Rekonosimentu pa e trahadó i Rekompensa hustu pa e trahadó.
FUENE: NÒCHI WILLEM/LIVE99FM
GIPHY App Key not set. Please check settings