PERSEKUSHON TA TERMINÁ KU DETENSHON

NOTISIA DI POLIS DI DJÁRASON 17 DI DESÈMBER TE KU DJALUNA 22 DI DESÈMBER 2025

Detenshon pa menasa

Djaluna 22 di desèmber, alrededor di 10.40 or di anochi, a detené un hòmber di inisial G.L.M. di 63 aña di edat na Kaya Anasa pa menasa. E sospechoso a menasá dos persona ku morto. Ta investigando e kaso.

Outo ta dal den poste di lus

Djaluna 22 di desèmber, alrededor di 12.15 or di mardugá, ‘meldkamer’ sentral a risibí notifikashon tokante un outo ku a dal den un poste di lus na altura di Rotònde Soeurnan di Rozendaal i ku tin herido. Na yegada di polis a topa ku un outo duars riba kaya. E parti dilanti di e vehíkulo i e poste di lus tabatin daño.

Shofùr di e outo a deklará ku el a pèrdè kòntròl di kua el a bai dal den e poste di lus. Ambulans a transportá tantu e shofùr i e pasahero pa hòspital pa tratamentu médiko. Debí na prioridat médiko, no por a hasi tèst di supla ku e shofùr.

Detenshonnan pa manehá bou di influensia di alkohòl

Den e dianan ku a pasa, polis a detené kuater(4) shofùr pa manehá bou di influensia di alkohòl. A hasi un tèst di supla ku nan ku resultado positivo.

Djadumingu 21 di desèmber, alrededor di 2.40 or di atardi, ‘meldkamer’ sentral a risibí notifikashon tokante un na e krusada di Hanchi Amboina i Kaya Nikiboko Nort di kua un outo a bòltu. Na yegada di polis a resultá ku na e krusada e vehíkulo a kore stret i drenta mondi. Na e sitio, e shofùr a nenga asistensia médiko serka personal di ambulans. Konforme e maneho di ‘botsen is blazen’ i pa motibu ku e shofùr tabata mustra diferente señal ku el a konsumí alkohòl, e agentenan a disidí pa hasi un tèst di supla kuné.

E shofùr a nenga di koperá, di kua a detené e hòmber di inisial M.L.R. di 67 aña di edat i a hib’é warda di polis pa un análisis di rosea. A listra e vehíkulo i a haña un kantidat di supstansianan probablemente narkótiko. A konfiská e supstansianan aki pa mas investigashon.

Shofùrnan ta legalmente obligá pa koperá ku un tèst di supla ora un agente polisial duna òrdu pa hasi esaki. Nenga di hasi un tèst di supla ta kastigabel pa lei i por kondusí na detenshon.

Djasabra 20 di desèmber, alrededor di 7.30 or di mainta, ‘meldkamer’ sentral a risibí notifikashon tokante un vehíkulo ku a dal den un palu di lus riba Kaya Nikiboko Nort. Konforme e maneho di ‘botsen is blazen’ a hasi un tèst di supla ku e shofùr. For di e tèst a resultá ku e shofùr a konsumí mas alkohòl ku ta pèrmití pa lei na momentu ku bo ta manehá un vehíkulo. Pa e motibu aki a detené e hòmber di inisial J.M.E di 44 aña di edat i a hib’é warda di polis pa un análisis di rosea. A base di e resultado, a konfiská reibeweis di e sospechoso.

Djasabra 20 di desèmber, alrededor di 3.10 or di mardugá, a detené un hòmber di inisial A.A.M.A. di 30 aña di edat na Kaya Nikiboko Sùit. Un patruya a para e sospechoso pa motibu ku e tabata manehá ku velosidat haltu. Durante di e kòntròl a hasi un tèst di supla kuné, for di kua a resultá ku e sospechoso a konsumí mas alkohòl ku ta pèrmití pa lei na momentu ku bo ta manehá un vehíkulo. A hib’é warda di polis pa un análisis di rosea. Despues di investigashon mas aleu a resultá ku e sospechoso no por a mustra un reibeweis i dokumentunan di seguro, motibu pa kua el a haña but.

Djaweps 18 di desèmber, alrededor di 9.25 or di anochi, a detené un hòmber di inisial C.C.B.C. di 31 aña di edat na Kaya Monseigneur Nieuwindt. E detenshon a tuma lugá despues ku dos outo a dal den otro riba e kaya menshoná. Un di e shofùrnan tabata mustra señal di a konsumí alkohòl i a purba tambe pa kore bai despues di e aksidente di kua a hasi un tèst di supla kuné ku resultado positivo. Pa e motibu aki a detené pa manehá bou di influensia di alkohòl. E no por a identifiká su mes na e sitio tampoko pa medio di un reibeweis bálido òf prueba di identifikashon. Tambe el a haña but pa manehá sin reibeweis, sin seguro i sin plachi di number dilanti. E otro shofùr tambe a haña but pa manehá sin seguro bálido.

Kòntròl di tráfiko

Den oranan di anochi di djasabra 20 di desèmber a tene un kòntròl planíá di tráfiko na Kaya C.E.B. Hellmund. A para i kontrolá un total di bintikuater (24) vehíkulo, di kua a duna seis (6) but.

E butnan tabata pa e siguiente violashonnan:

1x pa manehá sin lus di brek ku ta funshoná;

1x pa manehá sin seguro bálido;

1x pa manehá sin plachi di number dilanti;

3x pa manehá sin reibeweis bálido.

Lo tene e kòntròlnan aki regularmente na kua lo aktua ku man duru na momentu ku shofùrnan no tin e dokumentunan na òrdu i tambe si no ta kumpli ku reglanan di tráfiko. Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.

Aksidente entre pikòp i skuter

Djasabra 20 di desèmber, alrededor di 5.15 or di atardi, un aksidente entre un pikòp i un skuter a tuma lugá riba E.E.G. Bulevar. Personal di ambulans a duna shofùr di e skuter tratamentu médiko na e sitio mes. Konforme e maneho di ‘botsen is blazen’ a hasi tèst di supla ku ámbos shofùr, ku resultado negativo. Dokumentunan di ámbos shofùr i vehíkulo tabata na òrdu.

Outo a bòltu

Djasabra 20 di desèmber, alrededor di 8.30 or di mainta, ‘meldkamer’ sentral a risibí notifikashon tokante un aksidente riba Kaminda Gurubu. Un outo a bòltu. Na yegada di polis, e shofùr ya tabata pafó di e vehíkulo, ku tabata riba su dak. Konforme e maneho di ‘botsen is blazen’ a hasi tèst di supla ku e shofùr, ku resultado negativo. A dun’é but pa manehá sin reibeweis i sin seguro.

Ladronisia ku violensia

Djasabra 20 di desèmber, alrededor di 6.30 or di mainta, ‘meldkamer’ sentral a risibí notifikashon tokante un persona ku tabata na suela riba Kaminda Lagun. Na yegada di polis i ambulans a resultá ku e víktima tabata heridá. E víktima a deklará ku a maltrat’é, menas’é i ku e ta víktima di ladronisia. Ambulans a transport’é pa hòspital pa tratamentu médiko.

Polis ta pidi un i tur ku por a mira òf ku por tin mas informashon tokante e kaso aki, pa tuma kontakto mesora na 911, 715-8000 òf via di e liña di tep anónimo 9310. Ta investigando e kaso.

Aksidente entre outo i bùs

Djabièrnè 19 di desèmber, alrededor di 6.45 or di anochi, un aksidente entre un outo i un bùs a tuma lugá riba Kaminda Onima. E persona ku a mèldu a informá ku tabatin personanan ku tabata keha di doló i e shofùr di e outo a resultá heridá. Pa motibu ku e porta di outo tabata blòkiá, a dirigí brantwer tambe na e sitio. E banda di shofùr di ámbos vehíkulo tabatin basta daño. Ambulans a transportá shofùr di e outo pa hòspital pa tratamentu médiko. E personanan den e bùs no a result heridá. Konforme e maneho di ‘botsen is blazen’ a hasi tèst di supla ku shofùr di e bùs ku resultado negativo. E shofùr di e bùs a haña un atvertensia pa motibu ku e no tabata dispone di e reibeweis korekto, esta kategoria D, pa manehá un bùs. Debí na prioridat médiko, no por a hasi tèst di supla ku shofùr di e outo.

Ladronisia di plachi di number

Djabièrnè 19 di desèmber a drenta keho di ladronisia di un plachi di number. Den oranan di mardugá di e dia menshoná, deskonosínan a bai ku plachi di number di un skuter ku tabata stashoná na Kaya Grandi. Ta trata di e plachi di number MF-2694. Ta investigando e kaso.

PERSEKUSHON TA TERMINÁ KU DETENSHON

Djabièrnè 19 di desèmber, alrededor di 1.35 or di mardugá, a detené un hòmber di inisial A.R.W. di 50 aña di edat riba Kaya Bernadeta pa manehá bou di influensia di alkohòl i pa neglishá señal pa para.  

Un patruya ku tabata na altura di e krusada di Kaya Korona i Kaya Caribe, a tuma nota di un pikòp aserkando e krusada ku velosidat haltu. E patruya a disidí pa bai tras di e vehíkulo hasiendo uzo di señalnan óptiko pa par’é pa un kòntròl. A duna e shofùr diferente biaha òrdu pa para pero el a neglishá esaki i a sigui kore. Despues di un persekushon kortiku, e sospechoso a para ku su vehíkulo dilanti di un kas na Kaya Bernadeta.

Durante e kòntròl, e sospechoso por a mustra un reibeweis i seguro bálido pero e tabata mustra diferente señal di un persona ku a hasi uzo di alkohòl. A hasi un tèst di supla kuné ku resultado positivo.

A hib’é warda di polis pa un análisis di rosea i a konsekuensia di e resultado di esaki a konfiská reibeweis di e sospechoso.

Destrukshon

Djaweps 18 di desèmber a drenta keho di destrukshon di bentananan di un kran stashoná riba un sitio di parkeo na Kaya Gilberto F. Croes. Deskonosínan a kibra tur bentana di e vehíkulo. Ta investigando e kaso.

Ladronisia di baiskel eléktriko

Djamars 16 di desèmber a drenta keho di ladronisia di un baiskel eléktriko. Deskonosínan a bai ku un ‘fatbike’ koló pretu, modèl V8. E baiskel tabata stashoná na Kaya Dr. Jose Gregorio Hernandez. Ta investigando e kaso.