HISTORIA TA UN PELÍKULA KU TUR HENDE TA FIGURÁ ADEN I TA RESPONSABEL PA NAN AKTUASHON.

Kralendijk,- Nos tur ta papia di ayera i no di futuro. Pa trata na komprondé problemanan sosial, ekonómiko, estatal i maneho di e isla bo ta tende; no tin liderazgo i tokante futuro e ekspreshon ta; no tin vishon.

Nos ku a eligí miembronan di Konseho Insular i Konseho Insular ku a skohe e diputadonan i Hulanda ku a nombra Gezaghèber tambe ta responsabel pa loke a skohe.  

Nos ku ta biba den e komunidat boneriano i ta mira i eksperensiá loke ta pasa riba tereno di;  maneho, bibienda popular, pobresa, enseñansa, siguridat, salubridat, komportashon sosial, polítika, arogansia pa demostrá poder, diskriminashon, rasismo no por laga e kosnan aki bai sin reklamá, kritiká i husga. Ami ta reklamá, kritiká i husga pa no skonde tras di e ekspreshon di miembronan di e generashon di Alemania ku a bisa tokante e atrosidatnan di Adolf Hitler ”Nos no tabata sa”.

Abo no sa ku konsehal i diputadonan ta biaha ora nan haña ta bon sin pone abo na altura di nan biahe i no ta responsabilisá loke nan a bai hasi. Abo sa ku Kolegio Ehekutivo a risibí un kontesta di Representante interino di Reino tokante asuntu di Lèntfil.

Abo sa ki Gezaghèber ta bai hasi Hulanda si netamente tantu minister presidente di Aruba i esun di Kòrsou no ta bai Expo na Hulanda pa motibu di tenshon na Venezuela. Abo ku sa ku e kosnan aki ta mina e partinan esensial di demokrasia ku ta komunikashon i responsabilidat.

Bo tin pleno derecho demokrátiko pa zundra ami pasobra mi ta husga; konsehal, diputado, gezaghèber i ámtenarnan ku ta sigui òrdu. Amtenarnan di Adolf Hitler tambe a bisa “Ordu ta òrdu”  Mi ta hunga mi ròl den e pelíkula manera Voltaire i Rasputin.  Abo, ki bo ròl ta?

FUENTE: EWART SEALY/LIVE99FM