Redakshon
Kralendijk,- Diálogo Sentral den 2025 a tene inkluyendo esun di 8 di dezember awor en total 5 reunion ofishal mas nos tabatin hopi enkuentronan ku delegashonnan for di Ulanda i Kòrsou.
Manera ta konosí a oumentá e sueldo minimo i e kompensashonnan sosial, pero mester konstatá tambe ku na banda di gobièrnu pa manehá i mantené e kosto di bida na un nivel pagabel ainda no ta prosperando,
Di parti di gobièrnu di Ulanda e aña aki ainda nos pueblo por konta riba e supsidionan riba internèt riba e tarifa fiho di awa i koriente i e kontribushon di Usd. 1300 pa klientenan di WEB te na un sierto nivel di entrada i tambe riba e supsidio pa akohida di mucha despues di skol.
Tin indikashon ku e suspsidionan aki pa aña 2026 lo kai afó. Banda di esaki pa loke ta gobièrnu lokal no tabatin akshonnan konkreto pa atendé ku kosto di bida.
Te ainda no a realisá transporte públiko, no a logra entrodusí e supsidio riba hùr di kas den un forma general, miéntras ku pa loke ta preis di kuminda mester konstatá ku esaki a sali kompletamente for di man.
Ku tur rason komunidat i sigur esnan vulnerabel ta keha ku a duna oumento ku man drechi i a kita esaki bèk ku man robes. Gobièrnu a anunsiá ku nan lo hiba un maneho di minimo sosial di moda ku kada ken lo a sobra sigur 30% di su entrada den su pòtmòni.
Esaki a keda solamente riba papel pero no den realidat. Sindikalismo ta preokupá ku nos ta bayendo atrobe den e mesun situashon di pobresa riba nos isla, miéntras ku nos ekonomia ta bayendo den un bon direkshon. Rapòrt tras di rapòrt ta mustra ku e repartishon di nos prosperidat no ta yega serka sigur 40% di nos poblashon.
Un medida di belasten a trese un tiki alivio den sentido ku a reparti e peso riba e skoudernan ku por karga mas. Mirando e desaroyo aki, mas i mas e gritunan ta saliendo pa stòp di papia di “ekivalente” i ban papia stret riba igualdat entre Ulanda Oropeo i Ulanda Caribense. No mas ku djaweps último defensor di pueblo a ekspresá esaki i tambe a bisa kita e palabra “explain” for di e frase “comply or explain” i laga “comply” so keda.
Un di e retonan grandi pa sindikalismo den e tempu benidero ta sin duda bini huntu pa atendé e resultadonan di e rapòrt ku a sali resientemente por sierto riba petishon di sindikalismo, kual ta indiká e diferenshanan ku tin entre derecho laboral na Ulanda Oropeo i Ulanda Caribense pero aun mas preokupante e diferenshanan ku tin entre e islanan BES i e islanan KAS.
E último aki ta trese kuné un problema grandi den práktika di sentensianan ku Korte Komun mester tuma, kaminda e tin ku traha ku diferente leinan. Banda di esaki e rapòrt ta konstatá falta di konosementu di lei i reglanan riba nos derecho laboral serka tantu dunadó di trabou, trahadónan, pero tambe den korte.
Tambe sindikalismo mester sigui ku su esfuerso positivo pa organisá sierto sektor sigur den e tempu benidero, esta sektor di turismo, sektor di konstrukshon, sektor di akohida despues di skol i sektor di vigilansia. Den e rapòrt ta menshoná e balor di CAO riba e merkado laboral i ta boga pa promové esaki, pero tambe si esaki no ta prosperá na satisfakshon, mester konsiderá pa apliká e lei di “verbindend verklaren” di CAO pa sektornan. USIBO a duna semper preferensia na negosashon liber, pero nos mester tin na mesa si e dunadó di trabou ku e mindset korekto, esta ku e ta promové su trahadónan pa organisá nan mes den un sindikato, miéntras ku nan komo dunadó di trabou tambe ta organisá nan mes den un asosashon. Nos tin un ehèmpel klasiko den e sektor di kuido ku hasta a surpasá frontera di Boneiru i ta enserá Saba i Statia. Ta benefisio i bentaha so esaki lo tin i lo garantisá dos kos sumamente importante pa un desaroiyo sano di nos ekonomia, esta un balansa riba merkado laboral i trankilidat i pas laboral riba merkado laboral. Ta huntu nos tin ku karga e desaroyo sosial-ekonomiko di Boneiru.
FUENTE: NÒCHI WILLEM/LIVE99FM
GIPHY App Key not set. Please check settings